Sarik manuka
Mandanga gurindam putra balingka
Hari sinayan malam salasa
Bak takah urang sadang baduka
Walaupun bukan balasungkawa
Banyak ta isak urang mandanga
Walau ayie mato indak kalua
Anto nasib saburuak tu bana
Bak cando hiduik sabatangkara
Raso manonton film india
Ibarat kisah mahabrata
Srirama di tingga sinta
Dek ulah laku dasa muka
Atau ibarat carito legenda
Samsul bahri jo siti nurbaya
Hilang aka jo logika
Baniat kawin di alam baka
Antah maratok antah manyasa
Balungguak upek jo sasa
Ka bangih antah ka sia
Sulik mancari kato bana
Nasib di badan ba kaka
Babaco lalok di lantai bata
Tidua nan indak babanta
Basalimuik jo lapiak kamba
Dari pado babini batin tasiksa
Bialah indak barumahtangga
Labiah elok hiduik manduda
Indak maurusi amak paja
Tapi dicaliak kawan suok kida
Maimbau papa jo mama
Dicaliak pulo anak tetangga
Lah maimbau ayah jo bunda
Tapi timbua ragu hilang aka
Cameh datang rusak pangana
Dunia taraso baputa
Utak pusiang kapalo nana
Jauah bana awak tatingga
Uranglah sibuk bakaja
Awak masih tasanda
Bak cando lampu kurang daya
Sarupo urang basapeda
Kok lai bana duo roda
Tapi ndak kunjuang taputa
Indak samo jo ba Honda
Sumbu guyah stangnyo lia
Roda baliang jari jari tangga
Kaki sakik tarompa lungga
Tapak bisua ikua di kada
Jo a lah urang ka di kaja
Panek mancari jalan data
Tiok di kayuah tiok mahempa
Tampan ka londoang masuak banda
Sagalo kakok lah di kaca
Dari nan haluih sampai nan kasa
Lah dituruik jalan nan pasa
Kalua kampuang masuak kota
Nan bansaik tak kunjuang tangga
Panyakik tak kunjuang angga
Sansaro makin manjala
Parasaian makin maleba
Ujuang carito kok disemba
Disampiang mamohon jo bado’a
Mamintak toloang ka majo basa
Mancarikan jalan kalua
Tapi di ambo apo lah kaka
Nasib awak indak jauah beda
Bak cando tukak jo kada
Samo manangguang sakik jo gata
Kok elok bana tampak dilua
Ndak labiah fotamorgana
Bak palangi jo bianglala
Ba warna warni di angkasa
Ibarat kuini buah mangga
Umpamo cubadak jo nangka
Kulik kuniang harum manyeba
Ampia masak sadang mangka
Tapi itu tampak dilua
Di dalam lah busuak jo bata
Dek ulah laku ulek bua
Dalam urek nyo manjala
Ibarat baparak palawija
Sajak mancangkua jo manjaja
Takalo bijo ka dikaka
Sabalun ladang ka di tuga
Lah diagiah pupuak jo urea
Baa nak capek tumbuah aka
Lah tampak urek manjala
Tuneh daun lah kalua
Kanai panyakik kanai hama
Kanai musibah kanai bala
Disiko badan tasama
Indak tantu ka di kaca
Di urang lah balabuah kapa
Lah marapek di dermaga
Kok muatan lah babongka
Lah babayie pajak jo bea
Awak masih di tangah samudra
Masih di tangah lauik basa
Bagaluik jo lumba lumba
Bakawan jo ikan tuna
Antah sadang dima dima
Alun tau tampek basanda
Surek manyurek alun kalua
Alun jaleh ongkos jo sewa
Dek ulah mualim jo nakhoda
Tiok hari mabuak batangka
Lah hilang aka ABK
Pasisie sato talanta
Dapek lo kawan simalanca
Dimabuak hormat jo wibawa
Muncuang cipeh singkek aka
Angkuah somboang jo jumawa
Awak lah ba iyo bana
Deknyo ba tuka tuka
Nan arek nyo palungga
Nan lakek nyo patangga
Banyak sajo salah jo jangga
Salah titiak salah koma
Salah baco salah eja
Akhianyo tantu salah makna
Di nan sampik nak balega
sadang sarik nak manuka
Lah talantuang jo talangga
Lah tasingguang puncak kada
Kadang hiduikko bak main koa
Bia santiang bia jawara
Kalau nan sadang ka mangaya
Kalah jo urang baru bisa
Bak alang bangkeh jo amura
Malawan abak jo majo basa
Indak talok manga manga
Bantuak urang baru baraja
Lah sabaleh karateh di kaka
Indak ciek juo nan kamba
Saragi indak sawarna
Samo ujuang balain pangka
Dicaliak lawan suok kida
Lah manggantiak tiok sabanta
Baru duo kali puta
Cukinyo lasuang kalua
Di awak tiok di tengga
Pado nan samo banyak babeda
Usah lai cuki ka di kaja
Kalorok sajo haram tabuka
Untuang lai ba iman taba
Ba uruik dado pa banyak saba
Kok indak mungkin ta tampa
Atau rampak kaki meja
Untuak putra balingka
Ndak usah hati di pa lara
Kayo hanyo untuak sejatera
Tapi bukan untuak bahagia
31012011.Y.Jambak.
Tidak ada komentar:
Posting Komentar