AMPUNKAN MANDEH

AMPUN KAN MANDEH 03 April duoribu duo baleh Den tulih gurindam di karateh Untuak mangana jariah mandeh Nan jasonyo acok hilang laleh  Sayang nan indak dapek baleh Bak cando ayie didaun taleh Tiok nan jatuah lansuang maleleh Indak basiso jo babakeh   Dulu katiko ketek renceh Denai bak cando cincin ameh Sadatiak haram kok lapeh Bak cando tukak jo kapeh   Dari muloi pandai mangoceh Sampai pandai galak ta kekeh Walau jo tangih samo kareh Sampai lah santiang baciloteh   Bakajuikkan rangik jo ageh Lalok kok angek mintak kipeh Hari dingin basalimuik paneh Kok damam lansuang dapek ureh   Siang malam mandeh bakureh Kadang badagang jo manggaleh Barang abih pitih tandeh Ta hutang juo bali bareh Baa anak nak tatap mangumbeh Salero nyo jan tabateh Lupo hujan lupo jo paneh Asa anak lai pueh Lah pumpun kuku mangakeh Kapak patah sayok maranggeh Kakik sakik kuduak malaleh Asa lai putuih dapek uleh Usah lai dahan ka batuneh Putiak kalua lah bapangkeh Daun ma umbok lah ba rageh Baru bakulik lah mangalupeh Lah hilang barih jo balabeh Lah abih hinggo jo bateh Nan mandeh ba hati pueh Ndak ado sasa talinteh Sampai sikola manangah ateh Umpamo parak lah balateh Rumpuik sahalai lah batabeh Kok lai tumbuah batuneh  Tapi nyatonyo di caliak jaleh Tanaman kini tumbuah marangeh Parak jaguang parak naneh Parak limau parak paraweh Indak ciek juo nan boneh Banyak atah pado bareh Nan sambuah rantiang jo ranggeh Lah bantuak tanaman langkeh Sakik angga sasak lah lapeh Di caliak anaklah bak ayam bangkeh Taji panjang kukuak lah kareh Di galanggang tasabuik tangkeh   Tapi…… nan anak kurang abeh Jo ayah lupo jo ibu ndak jaleh Acok ndak paham sindie jo kieh Lah banyak nan acu bybeh Lupo katiko takapereh Hiduik ibarat takarak aleh Batanak saliter bapareh Makan jo randang banyak langkueh   Nan ado cacek jo ciloteh Bakatokan gaek nyinyie jo reseh Ba himbaukan rang tuo lenjeh Banyak sajo ganjia jo aneh Aka kurang muncuang cipeh Nan timbua somboang jo ongeh Lai dapek minantu nan segeh Tapi ndak paham sindie jo kieh   Mintuo nyo sangko babu jo upeh Mancuci baju piriang jo galeh Pa usia mancik jo lipeh Tiok manyuruah bakandak lakeh   Kini…. umua lah sampai di bateh Angok tabang nyawo kok lapeh Sabalun hiduang urang kapeh Takana janji anak nan sholeh Suok kida tangan mahampeh Taraso hiduik ba ereh ereh Hati jo jantuang manggarumeh Bathin bak raso di ampaleh   Kini den cubo manggoreh goreh Sambia mangakeh ngakeh Den tulih sasa di karateh Guno pambangkik bangkik tareh Pa ubek hati nan kurang pueh Panyambuang kandak nan ndak lapeh Ampun kan baa anak mandeh Nan salamoko ba angan lanteh   Ibarat lado kurang padeh Umpamo sop kurang cangkeh Hilangkan baa ceno mambakeh Jan di jadikan SILANGKANEH. 24032012.Y. Jambak.

ADAT JO SARA'

ADAT JO SARA’ Assalamualikum kapado dunsanak Nan sa ayah balain bapak Nan samandeh balain mamak Dima sajo kini manyimak Pak Arman Bahar lah basorak Walau jo suaro serak-serak Batanyo ka bakeh awak Satantangan adat basandi sara’ Santano di caliak jo di simak Dipikia di agak-agak Nan adat jo sara’ Bak umpamo kotak badak Kok nyampang kotak dibukak Disinan ado utk bacalak Ado pulo utk babadak Ado kaco nan tacelak Sakali kuak duo tampak Di elo ciek duo taserak Diganggam ciek duo tagamak Ka sadonyo untuak pa rancak Hanyo sajo dek lamo talatak Acok tingga jo taleak Kaco lah kumuah bakarak Dek jarang babukak jo bakuak Kini caminnyo lah ratak ratak Katiko bakaco jo bakacak Panek manggaya jo malagak Nan tampak bantuak basilemak Contoh lain umpamo Cubadak Batang limau jo batang jambak Buah labek baputiak banyak Rantiang gadang dahan badacak Batangnyo elok basanda tagak Urek manjelo duduak barapak Pucuak mahijau badaun rampak Tampek bataduah malapeh arak Tumbuah di ladang ba mintalak Babateh ranjau jo lantak Tapi dek ulah laku urang parak Sayang lai piduli indak Kini lah rimbo basamak Daun rimbun babuah indak Kok lai babuah tak kunjuang masak Putiak gugua lah manyamak Balek rabah paga lah rampak Ulah nan mudo bakatincak Lah tandehnyo hoyak hoyak Lah masuak pulo hewan taranak Parangai kamanakan jo anak Balanteh angan ba sijontak Lah tandeh tanaman nyo injak injak Ndak lai ado sagan jo anggak Langan jo batih lah bakacak Baradu santiang adu bagak Awak si anu kato awak Mabuak bagandiang jo bajoak Main bubuik main asak Main lambuak main lambak Main ladiang main kampak Main ungkai main urak Gadang carito jo kapoak Ayie satitiak ruok malimbak Tinggi buiah pado ombak Kalah galombang dek riak Cadiak lai tapi jangak Santiang tapi engak Dek maleh baraja jo manyimak Nan ado ngango jo ngangak Kadang ba tuka baruak jo cigak Ba imbuah pulo jo uwak uwak Urang galak awak galak Nan urang galakan nyato awak Mangecek balapuak lapak Indak babateh jo basibak Bantuak loncek dalam sayak Nyo sangkok dunia salaweh sangkak Ikolah carito nan tampak Satantangan adat jo sara’ Nyampang dipikia di agak-agak Kamanakan banyak salah gamak Bak rumah gadang lah lamo tagak Jariah payah niniak awak Marambah rimbo jo samak Maramu kayu dari parak Jo bismillah sandi di latak Ka bakeh tunggak manapak Tukang karajo pandai jo bijak Ndak ado bahan nan tacampak Lah di buek biliak ba petak-petak Di agiah ba umpuak jo ba tumpak Mahindakan salisiah jo cakak Jan sampai heboh badunsanak Tapi dek kamanakan bakambang biak Rumah lah jadi panuah jo sasak Lah hilang rono jo sumarak Timbua heboh jo si arak Rumah gadang ba hoyak hoyak Kamanakan lah ba sisalak Si mamak ma bentak bentak Lah tasingguang amai bapak Rang sumando turun marentak Ma aliah duduak bakisa tagak Mambuek gaduang jo rumah rancak Lah jaleh bateh jo sibak Mancaliak rumah lah runtuah sasak Batunggu ba unyi indak Tamporo rimbo laman lah samak Sandi banyak nan ratak Tabik pangana jo agak- agak Tabik raso timbua garak Labiah rancak di urak Daripado tagak manyamak Di satu sisi mamak basorak Walau suaro lah parau serak Anak kamanakan supayo kompak Manjago pusako nak jan usak Disisi lain nyato tampak Tutua mamak bak marentak Batanyo ka nan banyak Baa..kalau rumah di urak Tacangang kami tangangak Incek mato tabulalak Apokoh mamak manggaretak Atau sabana manggaregak Di bathin taraso sabak Walau di lahie indak tampak Walau mato barayie indak Nan jaleh ado isak Apokoh mamak dek muak Mancaliak kamanakan mancingkahak Lah banyak lagu jo lagak Gadang ota gadang kapoak Kalau hanyo takuik ka rarak Mancaliak rumah ba darak darak Itu mungkin dek kurang pasak Kabek sabalik buhua sintak Kami bak makan buah jarak Di lulua paruik manulak Di luahkan urang ta koak Di gumam taraso libak Untuak itu kami mamintak Kok buliah pinto jo pintak Kok dapek kami bakandak Usah di sabuik carai jo talak Toloang sikapi jo caro bijak Jan jo hati samak Kok carai adat jo sara’ Maratok minang kito pijak Mohon maaf ka nan banyak Iko carito ka ganti kolak Sambia bagarah bakucikak Kok tasabuik di nan indak Toloang maafkan Yanto Jambak. 15082011.

RATOK

RATOK Katiko bini lah pai lalok Anak lah sato pulo ngorok Den pai kalua ma andok-andok Taruih ka dapua ndak batembok Den cubo duduak di bangku jongkok Ka dindiang sanda malakok Raso basanda ka batang dadok Dek tunggak batuang ka ganti balok Babaju kutang basarawa kotok Ba kodek saruang batumbok Pinggang sakik kanai encok Dek acok tidua di lantai lambok Kaki gata tangan lah kurok Dek karajo nan jorok jorok Gilo mancari barang rongsok Sagalo lubang nan barosok Lampu nan tarang tarang lindok Bak umpamo dama togok Sarupo urang kalah ampok Lah bantuak kain karuah ta onggok Dek paruik taraso manggareyok Saharian ndak ado nan bakicok Sanjo babuko jo talua uwok Sadangkan anak sadang cangok Den bao tagak ma ongkok-ongkok Di cubo mambuka songkok Tanyato lah banyak nan lanyok Nan tingga piriang jo sendok Untuang ado saketek sanok Kuahnyo siso satangah mangkok Pisang jo ubi lah bakirok Tapaso itu nan basasok Lalu di ambiak sabatang rokok Siso pambarian si ucok Urang awak asa sianok Tapi lah gadang di sipirok Sudah dibaka di iruik asok Pandangan lapeh ka atok Taruih ka soyok soyok Dindiang kayu ndak batembok Dicaliak rumah lah bantuak parangkok Indak lai jaleh kama ma adok Antah rumah antah pondok Sarupo sajo jo waruang pojok Jarajak jo apo ka dilampok Lah gampang sajo urang mancigok Ndak ado lai tampek ma andok Lah bantuak ayam kanai rongkok Dalam kalam den cubo takok Bak ayie di rasok rasok Sisiek apo lah nan malikok Ndak ciek juo nan elok Sagalo karajo lah di kakok Muloi dari manokok- nokok Tukang bangku jo tukang jok Sampai di bengke tukang ketok Lah padiah jari manggosok Lah bagalimang tangan jo gomok Toke kanyang jo ampolok Nan awak kanyang dek sarok Dicubo bakunsi bakalompok Lah sadanciang jo saciok Lai sapalun ibarat asok Tapi kanyang awak dek ruok Awak nyo ambok ambok Nyo katokan santiang jo jagok Tibo dek inyo maogok- ogok Karajo lambek pitih cangok Sagalo usaho lah di adok Manggaleh baju manggaleh rok Bakuliliang jo oto box Masuak kampuang jo palosok Panek manggaruang acok acok Ma himbau urang baa nak madok Lah tandeh barang nyo kirok kirok Nyo ago di bawah pokok Kok bini ndak pulo anok Manggaleh goreang manggaleh godok Manggalaeh rujak jo karedok Manggaleh bubua jo kaleok Tapi …dek basambie jo orok Lah sibuk gilo jo popok Ndak lai tantu ka di kakok Anak pun sato ma obok obok Kok manangih ndak amuah antok Bak anak ayam kanai cotok Lah mabuak manciok-ciok Nan gadang takeok- keok Urang balanjo ta gagok-gagok Banyak nan tibo lansuang babelok Mancaliak galeh lah bacilomok Urang lah dulu takuok Kok dicaliak sabalah suok Nan manggaleh gadih semok Kulik putiah dado montok Pandai marayu jo mangijok Lah bak cando buruang sikok Lah panek tabang malayok Lah latiah kapak jo sayok Mancari pipik ka di raok Baru sajo ka mancotok Kuku baru ka hinggok Tibo sajo alang malenggok Tapaso kencoang suok Lai di cubo ba elok elok Jo tetangga kida jo suok Tapiiii bantuak sadonyo jajok Bantuak anak mancaliak kodok Kadang awak nyo olok olok Nyo katokan andie jo begok Pado hal inyo nan dongok Asa sumbarang takok Nyo katokan Padang bengkok Lah jaleh awak urang Solok Ampia sajo batamu kalorok Ampia den pakuak jo golok Di awak karajo nan indak talok Sajak hiduang di tampuah angok Mamaliang jo mancilok Sarato manodoang jo marampok Kok den pikia bainok-inok Elok bana nasib si ucok Takalo ka hilang lanyok Dulu kawan samo lalok Pernah samo tatangkok Samo samo gilo ampok Main remi main koprok Kadang biliard bola sodok Tapi dek nasibnyo nan elok Kalua capek dek manyogok Kamudian ado nan mambaok Awak ndak surang nan mancogok Lah sakian tahun ndak basobok Tau tau datang ma untok Katonyo pulang dari bangkok Caritonyo galeh babelok Ibarat tuneh baru mancogok Urek manjala baru malakok Ndak dapek kito manakok Ka jadi sirieah atau karakok Badan umpamo padi karanok Ka hiduik urang lah jajok Badoa denai sambia maratok Oi malaikat cabuiklah angok. Y.Jambak....10112012

RATOK KIAMBANG

RATOK KIAMBANG Kok indak takuik badoso Dari dulu mandeh den salahkan Indak kok tapikia salamo ko Sabalun denai dilahiakan Urang bakampuang banagari Namo basuku dibalakang Tapi di denai apo tajadi Namo abak sajo nan den sandang Usah lai basuku cando urang Kampuang sajo raso tak punyo Apo lai bagala di balakang Sadangkan abak banamo sajo Gadang denai bak kiambang Tumbuah manyeso dalam tabek Ulah dek awak gata urang Urang nan mandi banyak ma upek Barantiang indak badahan indak Urek kabawah tagantuang pulo Urang lalu badan basibak Mabuak talantuang jo talendo Kok jaleh kumpai jo cikarau Untuak kaubek mungkin paguno Atau di sawah jadi kalayau Dek kabau tamakan juo Tapi badan kok di agak Indak nan patuik ciek juo Ka jadi bungo barono indak Ka jadi rumpuik rancak banto Umpamo minyak dalam ayie Di bareh umpamo atah Lai bana masuak cipia Indak labiah ka jadi rimah Katiko di kampuang abak Tadanga urang bacarito Katonyo ambo bukan urang awak Karano induak urang jawo Lah tibo di kampuang mandeh Lain pulo carito urang Di talingo tadanga jaleh Amboko urang subarang Malang ruponyo mandeh baranak Labiah malang denai bainduak Kampuang indak basuku indak Baalah nasib denai isuak Di sabuik indo baiduang pesek Disabuik blasteran kulik saroman Jadi tamu di rumah nenek Jadi rang rantau di kampuang halaman Kok disabuik carito asa Di baco nagari jo kampuang Mandeh asli urang jogja Ayah barasa dari canduang Canduang kampuang kok dibaco Nagari asli ranah Minangkabau Tapi di Jogja barajo pulo Pusek kerajaan maso lampau Di baco sejarah dalam buku Di baco – baco namo kampuang Samo turunan darah biru Nagari samo bapayuang Dicaliak tuah ka mandeh Kiramaik ayah ka pambandiang Bak intan bakarang ameh Bak perak bahulu gadiang Ciak bulan ciek matohari Kaduonyo samo mancayo Tapi disiko silang tajadi Barabuik tuah kaduonyo Bulan bak cando ratu malam Matahari bak rajo siang Kaduonyo bak mandandam Sajak muloi dunia takambang Bulan marabuik sanjo Matohari mangaja subuah Nyampang batamu kaduonyo Indak ka tarang kalam dek suluah Itulah kini nan denai raso Bulan batamu jo matohari Gerhana sapanjang maso Kalam kasia minta tarangi Den cubo tanyo ka bintang Manga tajadi sarupo iko Patuih tibo kilek nan datang Mungkin galodo ka manjaweknyo Anok salah batanyo salah Kama di cari jawek nan elok Niniak mamak Basa Batuah Toloanglah danga bunyi ratok Datuak Parpatiah nan Sabatang Lah maingekkan dari dulu Tapi dek abak kareh arang Takunci muluik dek “jamu” Tangguanglah doso alang sarok Kaki sumbarang bacacahkan Indak bacaliak nan bacotok Cubadak bakecap nan tamakan Untuak alang nan tabang tinggi Sadang mancari tampek hinggok Jadilah contoh nasib kami Nan rancak alun tantu elok Untuak nenek sarato mbah Indak lai kasiah den harokkan Rang canduang tangguanglah sumpah Jogja lah lamo den lupokan Tabek tuhua : 10122000

SINGGULUANG BATU

SINGGULUANG BATU (Gurindam pagi.....) Mambaco Puisi di pagi Sabtu Nan ditulih dek sa urang Guru HANIFAH DAMAN dari Bengkulu Nan baru sajo baminantu Bajudul SINGGULUANG BATU Ibo hati tabik haru Takana maso nan dahulu Sabalun tahun duo ribu Barek taraso baban di bahu Nan tiok hari harus di pangku Badan rangkik tulang linu Pasandian taraso ngilu Bak katangga rasonyo kuku Panek manahan basitumpu Layuah sagalo siku siku Ndak kuat lai tangan mamangku Hati taraso padiah jo pilu Bak di sayik jo sambilu Jantuang taraso bak di paku Darah di nadi taraso baku Kama lah arah ka dituju Rumah tampak jalan ndak tantu Kasia lah badan ka mangadu Sakuliliang ndak mau tau Ka taruih raso ka buntu Ka suok kelok baliku Ka kida lurah babatu Ka diam sajo abih wakatu Simalakamo nan batamu Di makan kok mati ibu Indak dimakan Ayah nan "lalu" Basangketo batin jo kalbu Panghasilan indak manantu Anak marengek minta susu Nan gadang minta sarawa jo baju Nan tangah mintak bali sipatu Dirosok - rosok isi saku Hanyo tingga hitungan ribu Anak lah mabuak mangungu Paruik jo pungguang lah manyatu Dicaliak kompor ndak lai basumbu Ka di cubo masak di tungku Dicaliak di ateh pagu Indak manaruah sapotoang kayu Babali goreang tempe jo tahu Bagatok jo lado kutu Labiah bak raso dendeang paru Bak cando hauih dapek tabu Anak babali roti sumbu Atau sapotoang kue bolu Basuruah bayangkan roti keju Malakik nasi batamu Awak karajo ibarat pambantu Lah samo sajo jo babu Tiok sabanta kanai garutu Juragan manyuruah iko jo itu Kadang di hari sabtu jo minggu Urang lah sibuk ba pusu-pusu Awak gilo karateh jo buku Sibuk mam bagi-bagi ilmu Tapi ....dek picayo ka Nan Satu Walau ka baa angin limbubu Lai jo iman ba dayuang parahu Nan badai pasti balalu Walaupun alun tabilang mampu Lah kayo anak jo cucu Alhamdulillah bahagia batamu Ndak lai bantuak di kaja hantu...... 09032013...Y.Jambak

PASAN MAMAK XXV

UWIE UWIE MINTAK GATAH ( Gurindam siang) Baragam laku jo polah Dicaliek binatang bakurenah Kadang di kito ka jadi garah Sarupo uwie uwie mintah gatah Iko gambaran gadih batingkah Nan acok mancari masalah Lupo jo ranggaek ka susah Nan manggadangkan basusah payah Tingkah jo laku indak ta arah Akhlak kurang iman guyah Napasu kareh utak lamah Suko bajalan jarang di rumah Lai sakola di tarbiyah Jauah agamo jo ibadah Ndak tau jo sajadah Ndak paham jo ibadah Umua baru mudo matah Ibarat kacang mangacambah Urek sajo alun tacacah Baru baraja babuah Tumbuahnyo indak sumanggah Lagak somboang jo pongah Sadonyo paga ka nyo lalah Lupo jo kayu baranggah Nan ta handok ba simbah simbah Baputiak malayah layah Ma ampie ampie ka barabah Mintak di jambo jo dijamah Awak lah nyato paja sirah Baru baraja malangkah Masih babimbiang ba ta tah ta tah Lah nak bajalan ba koyah Iko namonyo salah kaprah Kurang aja kurang pituah Dek mandeh indak tatagah Dek mamak indak tasanggah Laku nan indak basitinah Ndak babateh pamatang jo sawah Akhianyo manjadi sampah Manjadi gunjiang jo pitanah Buncik paruik bantuak capah Salaweh niru jo tampah Lahie anak ndak ba ayah Kecek urang anak jadah Iko lah kini nan jadi masalah Basuo di rantau atau di ranah Untuak niniek mamak Basa Batuah Nak jan tabang babaliek awah Agiah pidoman tunjuakkan arah Nak nyo tau rimbo jo lurah Tunjuakkan umpan nan bagatah Nak jan sampai masuak lukah Hulubalang ba mato sirah Nan suko mahariak mahantam tanah Nan ka manjago tanah jo tumpah darah Pantang baburu indak mamatah Kana janji ingeklah sumpah Budaya kito lah tajajah Kamajuan lah salah kaprah Jan juo ba lengah lengah.... 28022013.Y.Jambak

RATOK MAK ENGGI (Serial Gurindam Ratok XX)

RATOK MAK ENGGI Kok didangakan ratok mak Enggi Saran Budo Nismah Rumzi Jantuang taraso ditusuak duri Malukoi limpo jo hati Antah ka sia salah di cari Ba itu bana nan tajadi Mandanga sajo lah ciuik nyali Kok marasokan apo lai Talapeh pangarang ba fantasi Atau dek pandai ba puisi Ba gurindam bahaso seni Pandai marangkai baso jo basi Kalau di tiliak di sigi sigi Apo lai amuah ma amati Banyak bana ka tando bukti Baiak di rantau di nagari Malangnyo nasib Mak enggi Maso ketek urang biati Lah bujang urang birahi Lah gaek ndak lai piduli Rambuik hitam lah baragi Lah cakuang dagiang di pipi Lah bakaruik kaniang jo dahi Lah banyak nan tangga gigi Sa umpamo di kantua pagawai negri Ndak lai manjadi kapalo seksi Ndak ado lai blanko jo kwitansi Lah hilang rekanan ba kolusi Rang rumah lah muloi antipati Kadang kadang lah apriori Lah banyak cemburu jo iri Mancaliak tetangga kanan kiri Maleh bajalan sarangkek pai Lah banyak malu jo risi Babimbiang tangan bapacik jari Alasan awak ndak mudo lai Banyak sajo nan taraso gali Lalok pun baganti posisi Bantuak pariuak jo kuali Bak cando balango jo panci Lah talambek kalua nasi Lah acok lupo teh jo kopi Kok lai bana lah babatehi Alasan diabet jo hipertensi Dulu bakolak jo sarabi Kok indak bubua kacang padi Kadang mentega ba apik roti Ba kaleang kaleang susu sapi Kini cukuik jo goreang ubi Atau taleh jo kaladi Abuih pisang sakali-sakali Jo teh paik satangah jadi Kalau dulu kok ka mandi Ba abuihkan ayie satangah panci Sabalun masuak ka garasi Balakekkan sapatu jo dasi Kok kini uruslah sandiri Sauak ayie mandikan diri Ayie angek jo ayie lali Tasarah sa suko hati Antah dek ulah emansipasi Pangaruah radio jo televisi Antah dek hilang tambahan gaji Hasie kolusi jo korupsi Lah banyak bicaro hak azazi Samo randah samo tinggi Salalu manuntuik hak istri Indak takana hak suami Lupo kalau awak padusi Status lah nyato bini Indak lai takana janji Ijab kabul di muko kadi Kok taragak kama ka pai Banya lupo ijin permisi Alasan acok pai mangaji Tanyato banyak pai marumpi Anak lah bak kato si bibi Indak lai ta awasi Kadang lah jaleh pil ekstasi Keceknyo ubek sakik hati Indak salah bait nyanyi Mambaco nasib laki laki Nan bak sapantun kudo bendi Atau bak cando kabau padati Kalua kandang pagi pagi Alun talakik manggosok gigi Alun kalua matohari Tali jo kakang lah bapasangi Kusie kok sadang elok hati Sagu bacancang nan nyo bari Babaruik baruik pungguang jo jari Bagosok gosok katiko mandi Tapi katiko sadang emosi Usah lah sagu ka tacicipi Nan kalua acok dadak basi Kadang jo banto saliguri Rumpuik sarajuik nan bacari Sa garobak urang ba eloi Lutuik lungga lah bangkak kaki Arang ndak lapeh jo kandali Dipunguang cambuik barapi api Panumpang tatap bakandak lari Babusa liyua tangah hari Kusia manyangko gadang hati Dulu tadanga puja jo puji Bunyi sorak allahurabi Bapacu kamari pai Taraso hiduik bagengsi Kinilah sajak baraliah professi Manjadi alat transportasi Manyaingi garobak basi Minumnyo solar makan nyo oli Nan tadanga cacek jo caci Kudo maleh kudo banci Kudo nan indak tau diri Lah panek uarang manggiloi Dari biaro ka bulkiktinggi Dari pikumbuah ka tanjuang pati Salaweh itu nagari Jalan manurun jo mandaki Baban ndak lapeh pulang pai Babagai bagai nan rang isi Sagalo isi paruik bumi Ndak labiah umpamo kuli Sanjo tibo malam mananti Di kandang untuang baratok i Sambia batanyo ka nurani Lamo lai masonyo Innalillahi….????? Ikolah contoh jo suri Ka ganti Introspeksi Walau ndak sadonyo ma alami Nan fakta tak dapek di ingkari Disusun sapuluah jari Maharok maaf baribu kali Bukan bamukasuik garagisi Atau macukia cukia biadi Mohon maaf ambo permisi… 10102012.Y.Jambak

SUREK DARI KAMPUANG XVIII

GALOK DI BUKIK LAMPU ( Gurindam Serial SUREK DARI KAMPUANG XVIII ) Maratok SUAR di bukik lampu Cahayo lah lindok abu-abu Bakirim pasan ka kapa kayu Ka urang rantau pasan tatuju Dunsanak sakampuang jo sasuku Nan samandeh balain ibu Sa ayah balain angku Ka dunsanak salam partamu Kok di kana maso dahulu Ka pidoman kapa jo parahu Cahayo nan tarang ka pinjuru Nak jan batamu karang jo batu Cahayo tarang ka lauik biru Jaleh taluak nan baliku Tampak tanjuang simalidu Lapeh ka Tarusan Jo Bangkahulu Tapiiii sajak di tahun duo ribu Lah tigobaleh tahun balalu Nan itu ndak lai batamu Lah bantuak dama ndak basumbu Nagari nan dulu ma haru biru Kinilah jadi abu-abu Lah bantuak camin kanai abu Roman jo bantuak ndak lai batamu Kinilah jadi sarang hantu Sarang hantu balau Sarang hantu aru-aru Lah jadi sarang hantu si begu Ka disabuik bana taraso malu Malu jo anak jo minantu Malu rang lain sampai tau Apo sabab dek ba itu Pondok baremoh Basusun paku Babiliak biliak dari bambu Kamar batirai bakulambu Ado bakasua di ateh bangku Gadih jo bujang ba pusu-pusu Cando itiak dalam paraku Kadang lah bantuak urang kubu Tangah malam ndak babaju Sibuk ma umbar hawa nafasu Tuo mudo bacumbu rayu Maisok ganjo manyuntik sabu Suok kida gadih bagincu Apo lai di hari sabtu Atau di malam mingu Lah bak cando kalalatu Barabuik mangaja lampu Nan mambuek kito pilu Iko di bekingi dek sardadu Urang gilo ba piluru Langkok jo topi ba sipatu Dek elok ka alek jamu Samulo mahormati tamu Basapu laman ba buka an pintu Pinjaik luluih kulindan lalu Iko dikami nan maragu Ndak kasia ka mangadu Rumah tampak jalan ndak tau Suok kida jalan lah buntu Mode malambuang manggajuju Sumangek kareh mangebu gebu Tapi hanyo teori di buku Ayie gadang sampan ndak laju Adat jo sara' lah mambatu Jalan di aliah urang lalu Lah kalah limau dek banalu Dek ba kura-kura dalam parahu Lah banyak murik ka hilangan guru Surau ndak lai ba Tuangku Kok lai bana nan batamu Pado basuaro banyak nan bisu Lidah patah bibie lah kalu Kok mangecek co urang gagu Lah banyak ini jo itu Ndak jaleh lai kama tatuju Pamimpin lah sibuk ba siteru Barabuik ma isi saku-saku Bantuak arisan ibu-ibu Sibuk ma ambiak kue balu Niniak mamak lah pumpun kuku Lah lupo baban di bahu Kamanakan di bimbiang anak di pangku Lah tahimpik lidah dek uang suku Ibarat kudo lah dapek sagu Cando anak dapek susu Lah bantuak kuciang di tungku Lah bagaluang sajo cando paku Dek pandai tukang maramu Jo demokrasi ba situmpu Hak azazi nomor satu Adat jo sara' nomor saribu Bujang lah mabuak bimbang jo ragu Bak alang-alang putuih taraju Lah bak kato angin limbubu Cando roda ndak basumbu Lah sabantuak ganiah jo balacu Lah samo sajo rimbang jo labu Oli sabantuak madu Lah baruok liyua baru tau Kini ka ujuang manih tabu Basangketo bathin jo kalbu Dirantau kito manggarutu Urang dikampuang batupang dagu 18032013.Y.Jambak

PADUSI LAWAH-LAWAH(Serial pasan mamak XV)

PADUSI LAWAH LAWAH (Gurindam pagi....serial Pasan Mamak XV) Tasabuik padusi lawah lawah Kok dibaco laku jo tingkah Dicaliak bantuak jo kurenah Yo bana padusi sa ulah Bajalah ta tatatah tatah Malenggak lenggok kok malangkah Pinggang gantiang kakinyo rajah Mato putiah bak sadah Muluik manih kucindan murah Bakato baramah ramah Mangecek basitinah Lunak gigi pado lidah Jarang pai acok di rumah Karajo mabuak babenah Tamasuak mamasak jo manyasah Ma urusi anak ka sikolah Itu nan tampak lahiriyah Yo bana istri solehah Ndak pernah bangih jo marah Walau anak banyak ulah Pandai kucikak jo bagarah Bara bana laki bapolah Nyo tarimo jo pasrah Ndak tabayang raso gundah Tapi...... Kok di silau batiniyah Isi dado kok di balah Isi kapalo kok di rangkah Ka di sabuik antah lah antah Niat manjarek nak manggatah Nak marampok jo manjarah Ndak piduli sia nan singgah Bia kumbang biapun labah Nyo buek sarang layah - layah Ba tarawang ba jalin indah Nyampang talakik kanai jamah Sempat kuku tacacah Bak manabang baliak awah Salah sangko salah kaprah Salah arti salah terjemah Banyak nan tarangah Sabalun dagiang jadi sapah Alun ka baranti ma nyasok darah Bak cando baluik masuak lukah Masuak gampang kalua susah Abih dagiang tulangnyo mamah Lah tingga karabang jadi sampah Disitu barunyo pindah Labiah bak cando panjajah Ikolah contoh jo kisah Baa padusi nan sarakah Tukang garejoh tukang parah Hilang iman dek rupiah Lupo pitaruah lupo amanah Kadang lah lupo jo sajadah Apo lai amal dan ibadah Lupo janji katiko nikah Untuak dunsanak nan saranah Nan samandeh balain ayah Hati hati dan waspadalah Jan tadayo jo nan sa ulah Rang tuo lah bapituah Di Minang lah jadi papatah Kok tadayo jo harago murah Alamat ka dipakai cacah..... 15032013.Y.Jambak

NASIBMU ANAS (Serial Gurindam kritik sosial V)

NASIB MU ANAS (Gurindam senja) Wahai kau Bung Anas Jika dibaca riwayatmu sekilas Bagaikan cerita dan cineas Engkau manusia yang cerdas Ibarat dari kali brantas Engkau cari jalan pintas Kau tumpangi bis patas Banyak lawan yang kau libas Terlepas dari curang dan culas Sudah berapa yang terlindas Kau selalu bisa bebas Karena mendapat prioritas Ketika Partaimu Mubes dan Munas Melalui pesuruh dan opas Kau sebarkan uang kertas Sebagai pelicin dan pelumas Sehingga hilanglah objektifitas Yang terang menjadi bias Yang nyata tampak sekilas Yang semu menjadi jelas Dengan gaya gemulai dan lemas Wajah dan tampangmu penuh welas Bicaramu bak memelas Dengan Nazaruddin sebelas dua belas Namun kau cukup trengginas Disaat orang bicara tegas Kaupun tak kalah lugas Dengan ucapan yang cukup pedas Dari manusia yang serba terbatas Kau menjadi yang berkelas Masuk dalam keluarga cikeas Jadi saudara angkatnya Ibas Berdua kau jaga brankas Bagaimana caranya mengisi kas Agar jangan sampai terkuras Untuk manjaga stabilitas Disitu kau berpikir keras Dengan segala aktifitas Proyek Hambalang yang begitu luas Kau jadikan ajang kreatifitas Dengan segala koneksitas Karena dukungan dan loyalitas Untuk menjaga istana dan aras Tindakanmu jadi bablas Bagaikan kambing telat di lepas Semua yang ada kau libas Daun kunyit daun lengkuas Sampai jahe dan sipedas Kadang durian dan nenas Ga perduli duri dan ranggas Kalah nyamuk dan agas Kau bagaikan binatang buas Bagaikan orang mabuk miras Kau lupakan patut dan pantas Kau biasa di panggil si Mas Dengan Ruhut kau bicara Horas Di saat kau ber kipas kipas Sembari tidur nyenyak dan pulas Orang lain menjadi panas Kau dibenturkan ke batu cadas KPK sibuk membrantas brantas Mencari rampok yang pake jas Atau maling yang tanpa tas Mereka menemukan berkas Akhirnya datanglah hari yang naas Bagaikan tepuk berbalas Ada ubi ada talas Kekuasaanmu pun di pangkas Kau di cukur dan di di kramas Di cuci dan di bilas Ibarat se ekor ayam ras Siap dimasukkan kulkas Bagaikan ikan kena potas Bagaikan mobil patah as Dulu kau tidur di kasur kapas Sebentar lagi mungkin tanpa alas Walaupun kau punya kartu As Tapi itupun belum jelas Masih samar dan bias Itu menurut Karni Ilyas Sekarang kau harus bergegas Mencari payung di hujan deras Mana nyaman kau di teras Hanya ber alas kardus bekas Ga perlu lagi komentar kau ulas Ga ada gunanya topik kau bahas Ibarat telor sebentar lagi menetas Yang akan melahirkan ayam Ras Banyak yang merasa belum puas Sebelum mukamu pucat pias Menunggu tali se utas Buat gantung diri di monas.... Minimal pindah ke Lapas.. Sungguh ironis dan kontras.... 02032013. Y.Jambak

KALALASO (Serial Gurindam sifat Binatang.x)

KALALASO (Bunglon) Mancaliak di ateh rupo Manimbang ateh nan ado Alam takambang kok di baco Manjadi guru salamoko Manuruik ajaran rang tuo tuo Baraja ka isi rimbo Ka sagalo nan banyawo Tamasuak ka tanamannyo Baiak nan tampak di mato Nan babagai rupo jo rono Atau nan tadanga di talingo Nan ba macam bunyi suaro Suko atau ndak suko Diraso atau taraso Picayo atau baduto Di bao atau tabao Nan jaleh kanyataannyo Tingkah jo laku banyak nan samo Sahinggo ndak salah urang bakato Indak saketek nan jadi pameo Kambiang hitam nan partamo Kuciang ayie nan kaduo Kini di baco nan katigo Baa sifatnyo KALALASO Bunglon bahaso lainnyo Nan pandai marubah rono Tibo di arang hitam baro Jatuah ka daun bantuak bungo Bak cando ula kapalo duo Katuju sinan suko kasiko Pimpiang di lereang ka tambiahnyo Kama angin kian condoangnyo Urang nan suko ma ambiak muko Sulik bana di picayo Muluik balain jo isi kapalo Nan paralu aman santoso Dima galeh ka balabo Baa untuang nan lipek duo Paruik kanyang lapeh salero Lupo pahalo jo doso Iko tajadi dimano mano Baiak di tampek bakarajo Atau ditampek ba usaho Sampai ka dalam rumah tanggo Banyak basi jo baso Walau kadang salah cando Muluik manih bak induak gulo Ati masam cando cuko Memang ado pribahaso Walau didalam harimau jo singo Nan kalua kambiangkan juo Indak bakaluakan apo nan ado Itu samato manjago raso Ipa bisan hando sumando Sanak sudaro jo tatanggo Hubungan baiak tatap tajago Jauah balain jo nan iko Sifat urang nan banyak muko Dalam pagaulan anak mudo Iko disabuik rembang mato Kini tingga di kito basamo Dima lataknyo raso jo pareso Kok buruak ado hikmahnyo Kok rancak ado caceknyo Yanto Jambak hanyo mancubo Jo dunsanak babagi raso Kok bana dari Nan Kuaso Kok salah maafkan ambo Y.Jambak..16022013.

SARIK MANUKA

Sarik manuka Mandanga gurindam putra balingka Hari sinayan malam salasa Bak takah urang sadang baduka Walaupun bukan balasungkawa Banyak ta isak urang mandanga Walau ayie mato indak kalua Anto nasib saburuak tu bana Bak cando hiduik sabatangkara Raso manonton film india Ibarat kisah mahabrata Srirama di tingga sinta Dek ulah laku dasa muka Atau ibarat carito legenda Samsul bahri jo siti nurbaya Hilang aka jo logika Baniat kawin di alam baka Antah maratok antah manyasa Balungguak upek jo sasa Ka bangih antah ka sia Sulik mancari kato bana Nasib di badan ba kaka Babaco lalok di lantai bata Tidua nan indak babanta Basalimuik jo lapiak kamba Dari pado babini batin tasiksa Bialah indak barumahtangga Labiah elok hiduik manduda Indak maurusi amak paja Tapi dicaliak kawan suok kida Maimbau papa jo mama Dicaliak pulo anak tetangga Lah maimbau ayah jo bunda Tapi timbua ragu hilang aka Cameh datang rusak pangana Dunia taraso baputa Utak pusiang kapalo nana Jauah bana awak tatingga Uranglah sibuk bakaja Awak masih tasanda Bak cando lampu kurang daya Sarupo urang basapeda Kok lai bana duo roda Tapi ndak kunjuang taputa Indak samo jo ba Honda Sumbu guyah stangnyo lia Roda baliang jari jari tangga Kaki sakik tarompa lungga Tapak bisua ikua di kada Jo a lah urang ka di kaja Panek mancari jalan data Tiok di kayuah tiok mahempa Tampan ka londoang masuak banda Sagalo kakok lah di kaca Dari nan haluih sampai nan kasa Lah dituruik jalan nan pasa Kalua kampuang masuak kota Nan bansaik tak kunjuang tangga Panyakik tak kunjuang angga Sansaro makin manjala Parasaian makin maleba Ujuang carito kok disemba Disampiang mamohon jo bado’a Mamintak toloang ka majo basa Mancarikan jalan kalua Tapi di ambo apo lah kaka Nasib awak indak jauah beda Bak cando tukak jo kada Samo manangguang sakik jo gata Kok elok bana tampak dilua Ndak labiah fotamorgana Bak palangi jo bianglala Ba warna warni di angkasa Ibarat kuini buah mangga Umpamo cubadak jo nangka Kulik kuniang harum manyeba Ampia masak sadang mangka Tapi itu tampak dilua Di dalam lah busuak jo bata Dek ulah laku ulek bua Dalam urek nyo manjala Ibarat baparak palawija Sajak mancangkua jo manjaja Takalo bijo ka dikaka Sabalun ladang ka di tuga Lah diagiah pupuak jo urea Baa nak capek tumbuah aka Lah tampak urek manjala Tuneh daun lah kalua Kanai panyakik kanai hama Kanai musibah kanai bala Disiko badan tasama Indak tantu ka di kaca Di urang lah balabuah kapa Lah marapek di dermaga Kok muatan lah babongka Lah babayie pajak jo bea Awak masih di tangah samudra Masih di tangah lauik basa Bagaluik jo lumba lumba Bakawan jo ikan tuna Antah sadang dima dima Alun tau tampek basanda Surek manyurek alun kalua Alun jaleh ongkos jo sewa Dek ulah mualim jo nakhoda Tiok hari mabuak batangka Lah hilang aka ABK Pasisie sato talanta Dapek lo kawan simalanca Dimabuak hormat jo wibawa Muncuang cipeh singkek aka Angkuah somboang jo jumawa Awak lah ba iyo bana Deknyo ba tuka tuka Nan arek nyo palungga Nan lakek nyo patangga Banyak sajo salah jo jangga Salah titiak salah koma Salah baco salah eja Akhianyo tantu salah makna Di nan sampik nak balega sadang sarik nak manuka Lah talantuang jo talangga Lah tasingguang puncak kada Kadang hiduikko bak main koa Bia santiang bia jawara Kalau nan sadang ka mangaya Kalah jo urang baru bisa Bak alang bangkeh jo amura Malawan abak jo majo basa Indak talok manga manga Bantuak urang baru baraja Lah sabaleh karateh di kaka Indak ciek juo nan kamba Saragi indak sawarna Samo ujuang balain pangka Dicaliak lawan suok kida Lah manggantiak tiok sabanta Baru duo kali puta Cukinyo lasuang kalua Di awak tiok di tengga Pado nan samo banyak babeda Usah lai cuki ka di kaja Kalorok sajo haram tabuka Untuang lai ba iman taba Ba uruik dado pa banyak saba Kok indak mungkin ta tampa Atau rampak kaki meja Untuak putra balingka Ndak usah hati di pa lara Kayo hanyo untuak sejatera Tapi bukan untuak bahagia 31012011.Y.Jambak.

KUCIANG KUROK (Serial sifat Binatang. IV)

KUCIANG KUROK Lah salapan gurindam mancogok Sifat binatang nan basingkok Nan kiniko ka buah takok Baa nasibnyo KUCIANG KUROK Jikok dipikia di inok inok Jan kan mancaliak atau manatok Mandanga sajo kitolah jajok Apolai ka mangakok Badan kuruih muko sambok Kulik kasek bululah rontok Karajo mangakeh ngakeh sarok Mancari apo nan ka di lutok Acok bamanuang di suduik tembok Atau di bawah tuturan atok Tiok sabanta kanai impok Kanai bae kanai lokok Maso dulu kok di tengok Umua mudo sadang montok Ibarat gadih sadang semok Ndak pueh mato manatok Dima sajo kalau basobok Banyak urang nak mancokok Nak mangaca nak marongkok Nak ma ambiak nak mam baok Rono rancak bulu rondok Sarasi ragi jo colok Lidah sirah bak bungo dadok Ikua panjang mato pitok Pandangan tajam cando sikok Kaki lincah badan badagok Kuku tajam runciang malakok Bajalan malenggok lenggok Kama pai babo baok Tiok sabanta ba kondok kondok Kanai cium kanai sungok Babaruik ba gosok gosok Kadang kadang babo lalok Basalimuik bakain saok Ba agiah baju pakai rok Di katiak jo pao manyalinok Kok litak makan di mangkok Bakaluakan isi songkok Babagai ikan nan batarok Kadang kadang dendeang batokok Itu katiko badan sadang tagok Induak samang sadang elok Kinilah jadi buah ratok Nan rancak dulu lah talimpok Ibarat hari kinilah sirok Matohari lah mulai lindok Mato tarang baransuak silok Sabanta lai malam mancogok Lah padam suluah jo colok Ndak ado lai dama togok Lah salah awai salah kakok Punyo urang nan tarosok Ayie cucian na ta tasasok Tabasuah muko jo ayie kobok Tasangko dadieh minyak gomok Dima liyua ndak ka baruok Disiko lah pangka urang ka jajok Dituduah lato jo jorok Tiok sabanta kanai lokok Kanai tunja kanai sodok Dek paruik acok mangareok Makan tapaso mancilok cilok Lah kanai ariak kanai garutok Kuciang lapa kuciang cangok Disiko darah ta sirok sirok Jantuang taraso ba dabok dabok Tulang pungguang taraso bengkok Tungkai layuah tanganlah cengkok Kadanglah bantuak urang olok Jadi palupo jadi begok Samo sajo kida jo suok Utak ndak lai manangkok Ikolah di awak nan tasuo acok Ibarat manggaleh lah tandeh pokok Untuang abih modal lah lanyok Tingga badoa sambia maratok Yaaaa... Tuhan cabuiklah angok........! 23022013..Y. Jambak.

KUCIANG AYIE (Serial sifat Binantang)

KUCIANG AYIE Kambiang hitam lah kito danga Baa bana buruak nasibnyo Ulah karajo manusia Nyo ndak manga kanai cemo Lain pulo jo KUCIANG AYIE Contoh parangai nan ndak elok Antah cadiak antah galie Dunsanak sajo nan manakok Dibaco laku jo parangai Ndak ciek juo rang nan suko Ka suok manggaduah ka kida ma intai Man cari cari peluang nan ado Kadang bantuak urang andie Mangecek ma lunak lunak Lah dapek tampek batinggie Tandeh urang kanai injak Malakik kandak balaku Lunak gigi pado lidah Lah tacapai nan nyo tuju Urang nyo anggap sampah Parangai banyak nan ganjie Baa mambuek urang manggigie Babagai caro nyo mamanggie Malakik urang ma ampie Lah dapeknyo manggisie Punyo urang nyo gutie gutie Barang urang nyo amie amie Urang talengah masuak kampie Nyo buek umpan di ujuang kayie Buah sampie buah tandikie Nyo ampok an ka ayie ilie Takicuah juo ikan mujayie Laku bak cando gatah cayie Mancari jalan nan lincie Baa urang nak tasialie Baa nak jatuah nak takilie Kok batamu jo urang gabie Apo lai jo urang andie Salasai bana nyo manumpie Baa urang nak ta sungie Sifat buruak bantuak kuwie Mambari jarang mamintak tagie Ba hutang rajin maleh mambayie Bajanji acok salalu mungkie Sifat lobo tamak jo kikie Kian kamari mangaku fakie Di rumah ameh ba buntie buntie Manumpuak bak karuang pasie Bukan mangieh jo manyindie Bukan pulo mambukak tabie Kok nyampang ado nan tagisie Usah manjadi buah bibie Anggaplah katan ndak bakarambie Makan sirieh ndak ba gambie Ibarat bendi ndak bakusie Bialah tulisan nak mubazie Hanyo di ambo nan tarakhie Kok batamu jo KUCIANG AYIE Ambiak tali jo talisie Suruahnyo manjarek lihie Bia nak jadi buah pikia Samo samo kito ba zikie Mandapek hukum nan adie Nak jan manjadi mati kapie.. Tukang ukie....15022013 Y. Jambak.

MANJAGOKAN ULA LALOK

*MANJAGOKAN ULA LALOK.* Mambaco tulisan nan macogok Manjagokan ula lalok Darah lansuang badabok Raso disiko batamu kalorok Di ijo dipandang tatok Mato taraso silok Lah bantuak urang pitok Tiok sabanta mangijok ngijok Indak tantu ka di tojok Bak bajalan dalam galok Ambo cubo marosok rosok Dima sababnyo kok lai basobok Ibarat mambuek dangau jo pondok Rumah papan rumah ba tembok Dapek tukang kurang paradok Kapandaian hanyo amuah jo akok Ma ukua ba takok takok Mangatam ba gosok gosok Manggarih bengkok bengkok Ma arik ma ojok ojok Indak dikasau lakek atok Indak dilubang nan batumbok Bukan nan tirih nan bapakok Indak di garih nan ba tenok Akhianyo tabuang balok Papan laweh jadi satampok Salah pakuak salah golok Banyak bahan jadi sarok Nan tabukak ndaknyo saok Nan batutuik nan nyo singkok Salah latiang salah cotok Disiko bakalibuik ampok Buliah sajo babuek elok Baiak pribadi atau kalompok Tapi ba onggok onggok Jan ado kesan manyogok Ambiak muko main suok Agak i pulo urang ka kuok Dek awak mungkin kuah sanok Kadang dek urang nyo sangko gomok Kok manggaleh kurang pokok Nak mancari isi ampolok Usah gadaikan sarawa kotok Agak i malu ka tasingkok Kok nyato badan kurang sayok Usah baniat tabang malayok Tapi tabang tabang hinggok Jan badan jatuah  talepok Buliah sajo kito harok Tapi usah manjadi  garok Main cakau main cokok Sadonyo sajo ka barongkok Salah pacik tangan sambok Salah tunjuak jari bengkok Salah caliak mato silok Salah langkah kaki cengkok Kok ka main ambok ambok Ibarat sopir dikelok Buliah sajo ma reok reok Tapi kana jalan nan lambok Kadang awak banyak nan sok Mangaku cadiak tapi olok Santiang tingga binguang ba baok Ba jua katan ba bali godok Kadang batanyo ka si ucok Dima nagari padang tarok Di baonyo ka sipirok Bakatokan urang nan ongok Manuruik ambo nan satangah bego Daripado babuek baiak , urang jajok Labiah rancak kito anok Duduak alif cando rajok Rancak tidua pabanyak lalok Bamimpi sambia ngorok Daripado jago banyak kuok Mambuek urang jajok Pangganti ganti kakok Sambia mangalai jo ma isok Kaganti sabatang rokok Ka panuka nuka takok Ambo tulih sabuah ratok Dalam gurindam langkok Nasib anak bak karanok Binguang kama ka malakok Carito anak nan babaok Parasaiannyo nan  basingkok Ulah apaknyo salah kicok Cubadak bakecap nan takudok Arok nan jadi siriah langkok Lah nyato badan karakok Tagagai di batang dadok Akhianyo paruik sambok sambok. y.JAMBAK NAN MAIDOK.

CINTO TATUNTUANG V (Serial Rundiang ka Mamak)

CINTO TATUNTUANG V (Serial Rundiang ka mamak) Lah ampek surek dari rantau Lah jimek babaco kasadonyo Carito kisah di maso lampau Kini mambayang di palupuak mato Tabayang maso di sakola Maso bagarah samo gadang Kini lah jadi buah sasa Nan tingga hanyo rupo mambayang Singkek carito maso itu Sajak mandapek surek ka ampek Pikiran di badan ndak manantu Banyak nan salah ta pabuek Sasuai jo carito tadahulu Dalam Rundiang ka sambilan Sajak mintuo lah dapek cucu Lah barubah pulo paratian Dalam bahaso nan tasirek Ndak dapek lai dipungkiri Lah banyak kato nan talompek Lah payah rasonyo mangamehi Singkek carito maso itu Elok di ambiak kaputusan Pado mangambang ndak manantu Elok di kumpua di ciek kan Dibuka rundiang ka mintuo Disampaikan niat dalam hati Niat nak pai karantau juo Walupun apo ka tajadi Pado hiduik bak kiambang Mabuak talantuang jo talando Ulah dek awak gata urang Urang ka mandi taniayo Ka ateh indak bapucuak Ka bawah urek tagantuang Rintang dilando lando biduak Ka buah sasa dek urang kampuang Bialah kampuang den tinggakan Den cubo turuikkan kaki malangkah Si Dira jo mandeh den titipkan Malakiknyo tamat di tarbiyah Kok lai mujua mandeh malapeh Bak ayam pulang kapautan Galeh abih pokok kok tandeh Pulangkan sajo ka suratan Ditinggakan pasan ka anak kanduang Elok elok manjago diri Jago hati enek jo anduang Pandai pandai ma ambiak hati Doakan mandeh bajalan Salamaik sajo di rantau urang Kalau lai di ijinkan Tuhan Dira manyusul di bulakang Mandeh karantau ikolah baru Alun manampuah kampuang urang Rumah tampak jalan ndak tantu Ba kalam kalam di hari siang Lah bulek tekad dalam hati Lah dikamehi nan ka di bao Lah di pasan ticket ka Bukittinggi Niat ka Jawa naiak oto Lah dapek ticket Gumarang jaya Duduak dibangku nomor duo Barangkeknyo hari Rabaa Tapeknyo minggu di muko Diambiak ticket di bao pulang Lah dicaliakkan ka mintuo Di muko tampak mambayang Mintuo bantuak ndak picayo Tasirek cibie jo cimie Mancimeeh caro haluihnyo Dalam hati mungkin tapikie Cubokanlah kok lai takao Maliek sikap mintuo Den jadikan panambah sumangat Sambie badoa Ka Nan Kuaso Tacapai juo nan di niat Lah tibo ukua jo jangko Sasuai jo hari nan ditantukan Baa carito salanjuiknyo Di carito ka anam den kabakan Bajalan jauah ikolah baru Usah disabuik ka marantau Galak jo tangih nan manyatu Lah bagaluik galau jo risau Di dalam surek nan kalimo ko Tasirek pasan ka nan rami Di hati mati di mato buto Baitu tekadnyo Nuraini Insyaallah di surek ka anam Ka ambo cubo manyampaikan Tigo hari duo malam Baa kisahnyo di pajalanan.. Diseso bayang 1992..Y.Jambak

CINTO TATNTUANG I (Serial Rundiang ka Mamak)

CINTO TATUNTUANG I (Mambaliak kisah) Dunsanak tacinto di badan diri Di dalam kisah RUNDIANG KA MAMAK Lah basuluah bak matohari Bagalanggang mato rang banyak Di dalam tulisan na ka duo Lah ambo cubo manyampaikan Ramuaknyo hati kawan ambo Mandanga denai di jodohkan Sabalunnyo lari tabang ambua Sapucuak surek nyo tinggakan Danga dek dunsanak buah tutua Ka ambo cubo manyampaikan “ Assalamualaikum pambuka kato Doa salamat ma iringi Ka ganti kito bajawek kato Surek sapucuak ma wakili Diak kanduang Nuraini Kawan sabangku lahie jo batin Sulik rasonyo den bapahami Adiak putuihkan talin sapilin Tali den arok ka buayan Pa ayun langkah dalam hiduik Kini ruponyo tali gantungan Mamak adiak nan marangguik Bak patuih di tangah hari Mandanga carito tangiang ngiang Adiak lah urang nan den sayangi Tanyato ka disuntiang urang Berang indak bangihpun bukan Apolai banci ka di baco Hanyo suratan nan den salahkan Manga ko badan buruak pinto Denai tau jo diri adiek Salamoko kito bakasihan Di hati tabayang cabiak cabiak Walu di lua indak bakasan Dek sabab karano itu Didalam surek sahalai nangko Hapuihkan bimbang jo ragu Usah di lawan urang tuo Turuiklah parentah mamak Usah manjadi anak durako Kalau lah Tuhan nan bakandak Manusia ndak mampu apo apo Usah diak pikiakan diri denai Nasib lah sudah jo suratan Ka langik bana pai manyangai Panggang tak kunjuang takariangkan Hapuih banci buanglah dandam Campahkan jajok jauah jauah Maso lalu bialah nak kalam Tarang ka muko nan ka ditampuah Tananglah adiak di tangan urang Biakan denai jo untuangnyo Jo suok jawek kasiah sayang Jo kida hapuih ayie mato Insyaallah duo hari ka muko Mungkin denai lah ma hilang Daripado di kampuang baputiah mato Den piciangkan mato ka rantau urang Kalau lai umua samo panjang Doa kok lai adiek iriangi Tabuka pintu di nagari urang Tabuka pulo pintu rasaki Usah tanyokan kamano arah Bialah bak kato ampu kaki Tekad jo niat bulek sudah Adiak indak ka den lupoi Den bao tekad ka rantau Den simpan niat dalam dado Danga lah lagu mudiak harau Baranak ampek den nanti juo Akhia kato ujuang tulisan Maafkan salah nan salamoko Rilakan sajo nan tamakan Nak jan manjadi buah doso 10052002…Firman Chaniago Itulah bunyinyo surek Nan ambo tarimo dari kawan Nan salamoko ambo lipek Barulah kini ambo bukak kan Ampek kali bakirim surek Alun babaleh sakali juo Ka ambo bukak kan ba lambek lambek Di CINTO TATUNTUANG nan ka duo. 10112002.Y.Jambak

RUNDIANG KA MAMAK X

MANCARI JAJAK (Rundiang K mamak X) Dunsanak juo di badan diri Ka tampek malapeh tutua Lah panjang kisah nan tajadi Alun juo taraiah mujua Kini disurek ka sapuluah Kisah badan mancari jajak Dangakan bana sungguah sungguah Kisah kasieh dirangguik mamak Sasudah rundiang jo mintuo Difa di bao masuak biliak Di bao ba iyo jo batido Di sampaikan mukasuik baiak baiak Dari pado hiduik baputiah mato Bialah mati baputiah tulang Bialah gagal dalam usaho Mati syahid dalam bajuang Kito cubo mancari jajak Nak jaleh tampak buktinyo Hujan taduah ayie basibak Jajak mambakeh pasti basuo Aso hilang duo tabilang Langkah nan indak di ganjua suruik Bialah mati di galanggang Dari pado hiduik pangacuik Dek anak lai tau diri Paham jo seso mandeh kanduang Lah bulek tekad dalam hati Ka rantau ma adu untuang Kok taraiah di untuak elok Disinan mumbang jadi kalapo Nan dicari sinan basobok Jaleh hitam putiahnyo Kok sabuik naknyo tarapuang Kok batu bia tarandam Pado manyeso dalam kampuang Elok karantau mambao dandam Sabalun manyabuik ka mintuo Mamintak ijin elok elok Dikarek carito samantaro Di bukak carito nan talampok Dalam manuang duduak bapikie Manyusun langkah pajalanan Ibarat kapa ka balayie Sambie mahituang kalangkapan Takana surek nan batarimo Dalam carito nan ta icie Di “Rundiang ka mamak nan ka duo” Itu dibadan nan tapikie Carito jo kawan nan sabangku Mandanga denai di jodohkan Ramuak hatinyo ndak manantu Lah tigo tahun kami pacaran Takalo ka lari dari kampuang Sahalai surek ditinggakannyo Batambah ramuak hati jo jantuang Walau babaleh sakali tido Salamonyo dalam parantauan Lah tujuah tahun sampai kini Lah ampek surek nyo layangkan Tando cintonyo alun mati Kasieh putuih cinto ndak hilang Indak kalapuak dimakan maso Bialah arek di ganggam urang Kok untuang elok ka tangan juo Bak cando lagu mudiak arau Baa cinto saputiah mego Bilah musim nak talampau Baranak ampek dinanti juo Sabalun carito ditaruihkan Elok di bateh jo disibak Ba biliak biliak bak durian Ba nabu nabu bak cubadak RUNDIANG KA MAMAK sampai disiko Di aliah carito ka babak lain Sungguah baraliah disinan juo Bak mangaji lahie jo bathin Kini carito babak kaduo Judulnyo “ CINTO TATUNTUANG” Pajalanan hiduik KISAH NYATO Surek ka sabaleh nan manyambuang Danga dek dunsanak baa kisahnyo Nuraini Pai marantau Famili indak dunsanak tiado Lai koh ado urang nan hirau? Kalapau ikolah baru Antahlah apo ka dibali Marantau ikolah baru Antahlah apo ka tajadi Ba macam macam nan tajadi Banyak carito nan kito danga Sa kejam kejamnyo Ibu Tiri Ibu kota talabiah bana Simakkan bana jaleh jaleh Nak sampai kisah ka ujuangnyo Karateh abih dawatlah tandeh Untuang kok lai ka gunonyo 20062013.y.jAMBAK Mc.Adat & MM/Penyiar Radio Pusako Minang 972 am tgr.

RUNDIANG KA MAMAK IX

MALAPEH KABEK (Rundiang ka mamak IX) Lah salapan banyaknyo surek Ka sambilan jo nan iko Kok lai nan elok agak ciek Ambiak dek dunsanak hikmahnyo Lah basuluah bak matohari Lah bagalanggang mato rang banyak Apo sabananyo nan tajadi Di dalam surek lah taserak Lah tabik tanyo dek mintuo Mamintak baa pandapek Lah tajadi bantuak iko Apo lai langkah ka dipabuek Mandehkan alah manyabuikkan Satantangan diri si Dira Bialah kami manggadangkan Di asuah mangaji jo sikola Ayahnyo usah di arok Lah bantuak itu pangakuan Galeh abih lah tandeh pokok Lah nasibnyo ka dipangakan Walau bapaknyo ndak acuah lai Kami kan lai batangguang jawab Tak guno lai manyeso diri Usah di cari pangka jo sabab Putuih badantiang tali gandang Putuih di lendo langan baju Di nan luruih jalan manyimpang Abih untuang carai daulu Suruah indak tagahpun tido Tingga di anak mamutuihkan Kami tarimo jo hati suko Ambiak sabuah kaputusan Mandanga tutua kecek mintuo Badan nan indak takajuik lai Galak indak sengeangpun tido Duduak sajo den pa eloki Mintuo denai nan elok bahaso Nenek kanduang dek si Dira Kok itu nan jadi buah tanyo Jawek ambo cubolah danga Lah nyato karakok nan manjulai Siriah juo bajunjuang tinggi Lah nyato kakok tabangkalai Mandeh baniat manyudahi Cupak panuah gantang balanjuang Nyampang basuo saliter indak Usah salahkan sarueh batuang Mandeh manggantang nan kurang bijak Tekad bulek niat lah taguah Lah abih ragu jo bimbang Patah kapak batungkek paruah Nan galanggang ka denai hadang Angok putuih nyawo basintak Kini mati isuak ka mati Abih dayo badan talatak Sasa nan indak ado lai Manga mandeh ba payah payah Biakan si Dira jo untuangnyo Usah di ambek jo ditagah Biakan si Dira tatap jo ambo Kami cubo ma ansua langkah Walau barakik batang pisang Layie cabiak dayuang kok patah Bia nak hanyuik dek galombang Di kao mako di raso Di cubo mako dirasai Padonyo kandua ma leo leo Diragang kabek nak nyo ungkai Kato nan usah mandeh jawek Elok lah rundiang kito tutuik Bialah surek nak ambo lipek Katando bukti urang panakuik Kato putuih rundiang salasai Si Dira babao masuak biliak Di sinan ratok ba usai Hati bak raso di cabiak cabiak Niat ciek pangana satu Tekad indak dirubah lai Di surek sapuluah dunsanak tau Apo rencana badan diri…….. (basambuang) Sa abih pikie, 2006/2013 Y.Jambak

RUNDIANG KA MAMAK V bag 2

PANEK BATENGGANG (Serial gurindam Rundiang ka Mamak V)bag.2 Mandeh sibuk di pasa Ayah mabuak bakuli Adiak adiak masih sikola Jo sialah badan ka babiri Tumbuak tanak di badan surang Sauak ayie mandikan diri Indak jo sia kabatenggang Kalam rasonyo tangah hari Badoa badan ka Nan Kuaso Mintak pitunjuak pado Illahi Toloanglah baa badan nangko Salamaikkan anak jo badan diri Takana pituah guru mangaji Maso sikola di tarbiyah Anak adolah titipan Illahi Harus di jago bagai amanah Usah upek I nan tajadi Tuhan babuek sakahandakNyo Manusia ndak akan di uji Di lua bateh kamampuannyo Baitu tutua ayah jo mandeh Mintuopun sato manasehati Usah ragu bimbang jo cameh Biaya malahiekan bak kato kami Uda kau sadang sibuk bana Dek hari lah hampie ka puaso Kadainyo sadang kanai bongka Baitu kaba kami tarimo Urang mambangun patokoan Pasa nan lamo babongka abih Buliah sato pindah kasinan Tapi harus manambah pitih Saratuih juta dimintak urang Itu baru uang pangkanyo Dek itu mangko ndak bisa pulang Sabalah dulu samantaro Itu barito nan badanga Nan manusuak anak talingo Masuak suok kalua kida Jo oooooo sajo bajawek carito Niat ciek pangana Satu Tekad indak den ubah lai Ado ndak ado nan mambantu Anak den asuah surang diri Walau tasabuik dek mintuo Kok nyampang lahie anak nanti Bialah kami mamaliharo Nak jan tagaduah kama ka pai Manyimak tutua ujuang kecek Alun bakilek lah bakalam Barubah arah baraliah niek Nan abu abu samakin hitam Ndak doh lamo tarasonyo Hari cukuik bilangan panuah Malam kamih pukua tigo Malahiekan badan basimbah paluah Ditabang batuang ka lantak Di kuduang sambilan jari Barakaik do’a jo pintak Lahie lah surang anak padusi Sahari lahie sahari banamo Sia lah namo nan babari Ambo sampaikan disurek barikuiknyo Basabalah dunsanak mananti Rumah dukun, 2013 Y.Jambak

RUNDIANG KA MAMAK V.bag 1

PANEK BATENGGANG (Serial gurindam Rundiang ka Mamak V)bag.1 Dunsanak pandanga di rantau urang Malayang pulo surek ka limo Ibarat banang ka dirantang Jikok di ukua baru saparo Bak marantang alang alang Kok lai amuah tabang tinggi Untuang kok lai angin kancang Nak ambo loro sa abih tali Tapi santano ndak baribuik Dipunta baliak ka kumpalan Pado di rantang tali kokkusuik Bialah lapuak dalam ganggaman Dijapuik carito nan tingga Kisah nan sadang tabangkali Duduaklah dunsanak di nan data Dangakan kisah nak ambo urai Lah tigo bulan junjungan pai Kaba sahieh alun lai dapek Antah baa kabanyo kini Badan samakin hilang sumangek Maso di urang babulan madu Maso ba galak ba manih manih Maso di denai bulan ampadu Siang malam gilo jo tangih Sasa ndak lapeh dari mamak Ulah manuruikkan kato baliau Kini bak takah urang pakak Tiok di imbau tak kunjuang hirau Mandeh ndak tau ka di sabuik Nan ayah ba itu pulo Takunci rasonyo muluik Lah patah lidah babicaro Dunsanak pandanga di rantau urang Ka tampek badan manumpah tutua Abih malam baganti siang Badan ndak ranggang di tampek tidua Lah limo bulan hitungan maso Sajak di hari panikahan Di paruik ado nan taraso Nan lain dari kabiasaan Bak takah urang masuak angin Tiok sabanta ingin muntah Kandak salero balain lain Bakandak asam rujak buah Kecek urang ba badan elok Walupun buruak nan dirasokan Makin dikanang makin jajok Walupun sulik malupokan Antah iyo bijo nan elok Antah dek tanah elok paminto Tanaman tumbuah tuneh mancogok Ruponyo lah masuak bulan katigo Baputa-puta pangana utak Lah bulak baliak kato hati Ingin rasonyo mati tagak Pado co iko nan tajadi Lah nyato badan babadan duo Nan apaknyo dimalah kini Manganduang baru sakali nangko Awak dirumah surang diri (Basambauang) 1996/2013.Y.Jambak

RUNDIANG KA MAMAK IV

HATI NAN GALAU Malayang pulo surek ka ampek Walau ka rantau bakirimkan Ka Niniek mamak sasaran tapek Baliau nan punyo parsoalan Panyambuang carito nan talampau Lah tigo surek malayang Carito tantang hati nan galau Ganang tak kama ka di buang Sabulan sudah nikah kawin Babulan madu kato urang Sangketo tak sudah dalam batin Galau nan timbua-timbua hilang Banyak tamanuang pado galak Walau muluik manyengeang juo Di lua asok nan tampak indak Hati di dalam lah mam – baro Bicaro banyak nan suntua Bak sibisu barasian Bamiang lalok di kasua Sanang di lapiak panjamuran Maninjau padi lah masak Batang kapeh batimba jalan Hati risau di bao galak Bak paneh manganduang hujan Junjungan diri kok disabuik Bak takah urang dapek undian Galak tak lapeh dari muluik Tebar pesona urang katokan Manggeleang kian kamari Bak sipatuang kakanyangan Kadang bak cando lupo diri Kecek talompek balabihan Singkek carito suatu hari Nyo imbau badan ba muko – muko Nak manyampaikan kato hati Baa rencana kamukonyo Sinan tabukak rundingan Uda nak baliak ka jawa dulu Toko lah lamo batinggakan Kadai lah bak kato pambantu Tinggalah adiak samantaro Bialah uda barangkek surang Banyak nan harus disalasaikan Tarutamo hutang piutang Uda salasaikan tampek tingga Tukang karajo sadang tangguang Lah tibo golek di nan data Disinan adiak uda gungguang Sapanjang tutua buah kecek Indak babantah ciek juo Hanyo saketek sajo bajawek Baa kalau sarangkek sajo Kok iyo tukang tabangkalai Tampek tingga nan uda rusuahkan Ambo rela lalok di kadai Dari pado tingga bajauhan Mandanga jawek badan diri Patah lidahnyo babicaro Bantuak urang sakik gigi Ndak tantu ka nyo baco HATI NAN GALAU (Gurindam Rundiang ka mmk IV) bag.2 Disambuang carito nan kapatang Sasudah katonyo denai jawek Tabik rabo tibo buransang Walau jo kecek lambek-lambek Nn..de..dek adiak cubo dangakan Usah di bantah denai bakato Dek ambo itu pantangan Kecek denai ba salo – salo Lah bapuluah pagawai baranti Dek suko mambantah jo manyalo Ambo mambari kato mati Bukan doh untuak nak ba iyo Bak mandanga patuih tungga Sadang badantuang tangah hari Bak cando itu bahaso kalua Sulik rasonyo tapahami Kiamat taraso bumi Allah Baguncang candonyo tampek tagak Kini lah nyato tampak buah Bijo nan ditanam mamak Tanyo nan indak bajawek lai Tampek tidua manyudahinyo Maratok jo banta sampai pagi Guliang ndak manga tabao sato Ndak doh salah kato rang tuo Datak hati silau – silauan Walau lah taraso dari samulo Tapi nan iko di lua dugaan Indak carito dipanpanjang Dikamehi sajo ujuang carito Lah babaliak kinantan tabang Tabang mambao paso paso Hari sinayan maso itu Hari pasa di pakan baso Den lapeh nan kanduang hinggo pintu Sampai ka Tabiang ndak takao Tingga lah badan jo untuangnyo Sambie manghayal manarawang Ka Tuhan nasib basarahkan Takdir lah jaleh surang surang Walau ba ulang-ulangnyo sampaikan Dirumahlah dulu samantaro Indak ka labieh dari sabulan Disinan baru basamo kito Nan hati sulik di bao ba iyo Ulah dek nurani ba kato lain Lah patah lidah babicaro Basangketo lahie jo batin Lah payah mandeh manyabakan Jan sadiah tampak dek urang Mintuo pun sato ma yakinkan Apuih lah ragu buanglah bimbang Dunsanak tacinto di rantau urang Tampek mangadu badan nangko Lah tigo bulan udaden tabang Alun ado kaba barito Surek sapucuak usah disabuik Pasan ka urangpun indak talakik Nan ado kaba muluik ka muluik Kaba di bao buruang pipik Antah tapuang antah nyo sadah Antah kasai ka badak muko Antah asuang antah pitanah Antah urang jajok ka ambo Tapi di surek nan ka ampekko Ado nan ingin di sampaikan Apo nan tajadi di diri nangko Di surek kalimo ambo jalehkan. Biliak tingga, Akhir Tahun 1996/2013 Y.Jambak

RUNDIANG KA MAMAK III

BASARAH DIRI (Rundiang ka mamak III) Tuan kanduang di radio Dalam tapian ranah minang Mancogok baliak surek ambo Kok lai juo di danga urang Den anjuangkan sakali lai Nak tabang bana ka udaro Den sambuang carito saketek lai Nak tarang bana ujuiknyo Lah tibo malah di janjian Hari jumat maso itu Ayah bana nan manikahkan Disaksikan bapak panghulu Salasai nikah kawin Urang bado’a kasadonyo Manduo juo kato di bathin Sulik rasonyo di picayo Sajak dari malam ba inai Sampai baduo dipasandiangkan Anak daro jo marapulai Basuntiang ameh di palaminan Bak matohari ma apik bulan Bintang sato ta ijok ijok Ka Tuhan untuang den sarahkan Walau jo darah ba dabok dabok Dicaliek tamu nan datang Bak cando alek pacu kudo Dek mamak urang tapandang Ayah di hormati urang pulo Disabuik duduak baduo Pangana malayang layang Nan lah pai takana juo Baa kabanyo di rantau urang Den cubo manggigik lidah Apokoh badan bamimpi Den jilek bibie badarah Tandonyo bana nan tajadi Hari baransua laruik malam Nan tamu lah jimek pulang Lampu lindok baransua padam Nan mato batambah jalang Indak carito di pajaleh Kok indak pulo patuik di danga Lah sanang bana hati mandeh Golek lah tibo din an data Dek murai bakicau pagi Baru tau subuah lah datang Kok tahu kunci matohari Bialah lambek hari siang Ruponyo kini hari sabtu Hari pasa bukik tinggi Lah jago malah panganten baru Walau jo mato pisek pisek i Lah baliak badan di tapian Dek rumah alun basumua Mandehem urang sapanjang laman Antah batuak antah dek kuhua Sasudah minum jo makan pagi Dituruik malah rumah mintuo Manunjuak an putiah hati Indak bacacek jo baceno Hati mintuo kok disabuik Suliklah badan mangatokan Kain suto alun lai lambuik Alun lai manih tangguli basantan Kok divaliak pasangan diri Mabuak manyengeang jo galak ketek Rasonyo suko satangah hati Dimuko gamang tasirek Anak rang kayo urang tapandang Bapak disagani di nagari Awak surang samato wayang Jarang kandak indak tapanuhi Kok disabuik kadiri badan Banyak indak pado nan lai Dek mamak sajo urang nan sagan Kok harato jauah sakali Mandeh kanduang urang panggaleh Kok bapak tani badangkang Kaduonyo sibuk bakureh Balimo adiak di balakang Antah dek itu mangkonyo gamang Antah maraso talongsoang janji Antah dek saruan tanah abang Pangana bak cando indak di diri Denai baladang barulah iko Bijojatuah den tadangi Den kubua jauah cameh di dado Den pupuak tuneh cinto di hati Kok mulo tuneh ba urek Disinan tunggua den gadangkan Jaso parak kok lai ta ubek Di surek ka ampek den jalehkan…. Manjalang mintuo,.2006/2013 Y.Jambak.

RUNDIANG KA MAMAK II

DEN PATUHI ( Surek dari kamanakan II ) Tungganai Tapian Ranah Minang Nan mahimbau satampuah suaro Lah tibo pulo surek malayang Kok lai mungkin mamak baco Panyambuang surek nan dahulu Tantangan rundiang ka mamak Apo bana nan tajadi di hulu Mangko di muaro karuah nyo tampak Anam tahun mason an lalu Di ateh rumah pusako nangko Niniek mamak duo suku Lah sapakat basauah tando Hujan indak rinaipun indak Patuih badantuang tangah hari Baguncang rasonyo tampek tagak Kiamat taraso di nagari Mamak dipihak rang caniago Duo jo mamak rang sikumbang Mamak pancuang jantuang mudo Cando iko matahnyo pisang Kulik kareh isi bagatah Raso ka busuak isi di dalam Indak ka lamak dek barabah Di baruak sajo ala hu alam Alun basudi basiasek Katolah putuih di mamak surang Dek mandeh indak ta ambek Dek bapak sulik malarang Umua nan baru satahun jaguang Badarah baru satampuak pinang Urek nan sadang asyik bagantuang Mamak pindahkan ka lain lading Baru ba umua tujuah baleh Ba badak sajo baru ka pandai Kadapua badan alun lai kameh Konon pulo ka manggulai Kok mangaji alun lai khatam Sikola smp baru kalapeh Alun mancubo asin garam Alun tau jo lado padeh Ado nan labiah dari itu Nan indak mungkin mamak rasokan Ramuak hatinyo kawan sabangku Lah tigo tahun kami pacaran Kato urang mungkin cinto baruak Tapi dek kami antah lah antah Hati jo jantuang raso ka ramuak Sahari sajo kami bapisah Tapi dek takuik ka badoso Dek manjago hati mandeh Den hapuih cinto di dado Walau jajaknyo masih mambakeh Kawan sabangku kok di baco Mandanga denai di suntiang urang Bak di kaja anjiang gilo Tabang ambua ka rantau urang Denai di kawin dijodohkan Tasabuik juo anak mamak Usah di baco bantuak jo roman Namonyo sajo tantu indak Manuruik carito dari urang Nan kacalon junjungan denai Urang kayo di tanah abang Tokonyo sajo sapanjang jalan Singkek carito ka di baco Anam bulan sudah batunangan Niat mamak basampaikan juo Undangan lah langkok basebarkan Ukua tibo jangko lah sampai Mandarek kappa di tabiang Lah pulang calon marapulai Indak saketek nan nyo jin jiang Hari salasa maso itu Tigo hari sabalun dinikahkan Disitu baru badan batamu Sia bana calon junjungan Ironis kato rang kini Sulik di cari ka eloknyo Tampek bagantuang hiduik mati Baru kini batamu muko Di abad nan serba canggih Babaliak ka jaman siti nurbaya Walau bukan datuak maringgih Jalan curitonyo samo bana. Syamsul Bahri tabang jauah Surek sapucuaknyo tinggakan Tapi labiah bak mambunuah Di surek lain ka ambo kabakan.. Untuak pandanga tapian ranah minang Di a m tujuah tigo lapan Walau manapuak ayie di dulang Untuang kok lai jadi palajaran… Anjuang paranginan..02032002

RUNDIANG KA MAMAK

Ratok di Palaminan (Serial gurindam Rundiang ka MAMAK) Bag.1 Assalamualikum urang dirantau Ka Pusako Minang surek tatuju Ka radio rusuah dihalau Kok lai ka ganti dendang jo lagu Ampun baribu kali ampun Ampunkan denai dek nan banyak jari sapuluah kami susun Rela jo maaf nan bamintak Niniek mamak nan Basa Batuah Urang nan cadiek candokio Kok talompek kato nan salah Dek mamak maafkan ambo Dibiliak rumah gonjoang anam Di ateh anjuang paranginan Den usai isak jo gurindam Ratok den urai jo tulisan Kok tatapuak ayie didulang Ta cabiek baju di dado Bialah basah muko den surang Nak disitu cilalek nyato Tabukak kalambu dalam biliek Mamak kok duduak tangah rumah Kok takuik malu tacaliak Baolah ma engoang jo malengah Rampak pintu rumah gadang Biliek dalam nan kupak Bialah palaminan di caliek urang Dima bana hino taserak Mamak bakeh kami batenggang Pucuak bulek tumpuan kato Nan dianjuang tinggi di amba gadang Adaik jo sara’ nan bajago Ambek bangih tahanlah berang Suruakkan banci sapaduo Tasrak garuang di galanggang Ujuik ka mamak labieh saparo Mamak basilek di pangka karih Ambo malinteh di ujuang padang Di antaro banci jo bangih Disinan lihie denai kalang Ganjua kok indak dapek suruik Langkah kok indak mungkin baliak Lah abih tenggang jo patuik Disinan malah biang nak cabiek Kok kalah aka jo nafasu Syetan nan sadang bakuaso Mamak bak pisau tapacik di hulu Ambo kamanakan tapacik di matonyo Santano mamak baladiang tajam Kok mamancuang sakali putuih Usaikan bangih lapehkan dandam Kok lai disinan malu tahapuih Di mamak kato manurun Dek denai kato mandaki Salamo jatuah jadi ambun Sampai pagi ambo tadangi Tapi kok mamak salah tarah Babaliek awah panabangan Kiamat nagari rasululullah Tampek bapijak nan ka taban Dek panjek an surang mamak tarambau Pancarian surang nan bamakan Tangga hulu dek ambalau Lah pasak bana nan mangguyahkan Gabak tasangko angin lalu Basangko rinai ambun jantan Rabah payuang sasuku Lah basah saluak kahujanan Tapi kok hati mamak lai dingin Sadang panuah imam di dado Malu di ambiek ka pacamin Disinan Bana tasuonyo Kok karuah ayie di muaro Cubolah mamak caliak ka hulu Kumpalan nan punyo karajo Mangko kusuik banang di taraju Santano kusuik bak sarang tampuo Tantu jo api manyudahi Dangakan dek mamak surek ka duo Kusuik baa nan kami alami. Gadih tarumuak..20101994. (Basambuang)