KALALASO
(Bunglon)
Mancaliak di ateh rupo
Manimbang ateh nan ado
Alam takambang kok di baco
Manjadi guru salamoko
Manuruik ajaran rang tuo tuo
Baraja ka isi rimbo
Ka sagalo nan banyawo
Tamasuak ka tanamannyo
Baiak nan tampak di mato
Nan babagai rupo jo rono
Atau nan tadanga di talingo
Nan ba macam bunyi suaro
Suko atau ndak suko
Diraso atau taraso
Picayo atau baduto
Di bao atau tabao
Nan jaleh kanyataannyo
Tingkah jo laku banyak nan samo
Sahinggo ndak salah urang bakato
Indak saketek nan jadi pameo
Kambiang hitam nan partamo
Kuciang ayie nan kaduo
Kini di baco nan katigo
Baa sifatnyo KALALASO
Bunglon bahaso lainnyo
Nan pandai marubah rono
Tibo di arang hitam baro
Jatuah ka daun bantuak bungo
Bak cando ula kapalo duo
Katuju sinan suko kasiko
Pimpiang di lereang ka tambiahnyo
Kama angin kian condoangnyo
Urang nan suko ma ambiak muko
Sulik bana di picayo
Muluik balain jo isi kapalo
Nan paralu aman santoso
Dima galeh ka balabo
Baa untuang nan lipek duo
Paruik kanyang lapeh salero
Lupo pahalo jo doso
Iko tajadi dimano mano
Baiak di tampek bakarajo
Atau ditampek ba usaho
Sampai ka dalam rumah tanggo
Banyak basi jo baso
Walau kadang salah cando
Muluik manih bak induak gulo
Ati masam cando cuko
Memang ado pribahaso
Walau didalam harimau jo singo
Nan kalua kambiangkan juo
Indak bakaluakan apo nan ado
Itu samato manjago raso
Ipa bisan hando sumando
Sanak sudaro jo tatanggo
Hubungan baiak tatap tajago
Jauah balain jo nan iko
Sifat urang nan banyak muko
Dalam pagaulan anak mudo
Iko disabuik rembang mato
Kini tingga di kito basamo
Dima lataknyo raso jo pareso
Kok buruak ado hikmahnyo
Kok rancak ado caceknyo
Yanto Jambak hanyo mancubo
Jo dunsanak babagi raso
Kok bana dari Nan Kuaso
Kok salah maafkan ambo
Y.Jambak..16022013.
Tidak ada komentar:
Posting Komentar