“ BALI MAU “
Dunsanak RN nan ambo himbau
Baiak dikampuang atau dirantau
Sadang di lauik atau di pulau
Di Sumbar atau di riau
Sajak di canduang kt ambalau
Lapeh ka kamang jo kapau
Bk tinggi jo simpang lambau
Payokumbuah lapeh ka lintau
Atau nan sadang tagagau
Ta sialia jo tarambau
Masuak sawah masuak lunau
Salah pacik salah cakau
Kapalo sakik pikiran galau
Batin seso jiwa risau
Jantuang di kurok hati di panau
Talingo pakak mato sirau
Mancaliak nagari kacau balau
Ndak di kampuang ndak di rantau
Hen barehen hau barehau
Den bak kato den kau bak kato kau
Atok ndak lai lakek di kasau
Barih lah banyak nan talampau
Adat jo sara’ lah talanyau
Ilimu tinggi aqidah ta langkau
Kok di caliak Minangkabau
Antah kama “Minang” marantau
Nan tingga lah banyak kabau
Ditangah padang urang halau
Tamanuang tagak si bayau bayau
Maratok ka sitinjau
Panek sajo ma himbau himbau
Urang lalu ndak lai hirau
Ulama sakik kiay lah sakau
Niniak mamak banyak nan pakau
Nan tuo lah sato kakau
Suaro nan kareh kinilah parau
Kok tajam bana mato pisau
Hulu dek indak ba ambalau
Lah kalah silek jo kuntau
Dek ulah ganta jo anggau
Lah kurang sidiak kurang tinjau
Kurang caliak kurang silau
Lah tandeh rotan jo manau
Lah baganti sawit jo kakao
Banyak si Apek jo si Apau
Si Akang jo si Alauw
Ndak baluluak dapek cikarau
Dek kurang teliti kurang pantau
Antah cino antah rang macau
Dari Singkawang antah di sanggau
Antah lahie di hutan bakau
Ba Datuak indak babantai kabau
Dek lamak dendang tukang kantau
Lagu kalason sinar riau
Tangango urang di lapau
Tacampak godok mancaliak bak pao
Taserak pical ulah kwi tiau
Tumpah cindua manampak cincau
Batuka kalabu jadi hijau
Mancaliak taba onggok ampao
Tagadai salapah dek timbakau
Batuka siriah jo kalayau
Galak tasengeang buruang bangau
Mancaliak kaluih di alah pantau
Maratok lawang ka maninjau
Lah hilang paga jo ranjau
Apo katenggang anak kabau
Tabu rang ganti jo tibarau
Manangih Tandikek jo Talamau
Rimbo lah tandeh urang sasau
Kok lai bana tumbuah anau
Saga lah kalah jo duri limau
Dek ulah laku parangai BALIAU
Bak cando luluang hantu si bigau
Kito lah mabuak ratok jo rarau
Garuang lah sampai ka lubuak linggau
Kini puaso lah ma himbau
Manyuruah baliak ka surau
Jan biakan aka ba langau
Barasiahkan utak nan kusau
Baok bakasai jo balimau
Ka Batang tabik jo lambah harau
Atau barandam di batang arau
Nak hilang amo jo tungau
Jan hati kalam bak ngalau
Jan mato manjadi silau
Murai sabantuak jo barau barau
Dangakan bana bunyi jo kicau
27072011. Y.Jambak
Tidak ada komentar:
Posting Komentar