Selasa, 02 November 2010

RATOK RANG CANDUANG

RATOK RANG CANDUANG
(Surek dari canduang)
Assalamualaikum urang canduang
Nan sadang bakumpua ba rami rami
Dangakan surek dari kampuang
Nan kami titipkan ka pak wali

Lah malang kami baparak
Buah labek ampo sadonyo
Malang bana kami baranak
Anak banyak larek sadonyo

Batanyo urang bakeh kami
Apolah rundiang ka kami jawek
Saribu sasa dalam hati
Sakik nan indak dapek ubek

Manuruik carito kaba buruang
Dirantau banyak nan salah jalan
Bujang banyak ditangkok binguang
Gadih lah banyak nan hilang pidoman

Kok batua itu nan tajadi
Mungkin dagang malulua sumpah
Lah hilang cahayo matohari
Kiamat nagari Rasulullah

Kami lapeh dagang bajalan
Bukan doh untuak marantau cino
Mancari ilmu jo pangalaman
Mambangun kampuang jo pusako

Tapi kini apo disabuik
Balain tasuo jo nan di cinto
Layangan putuih bananglah kusuik
Kumpalan apo lai gunonyo

Kami tak harok jo pakirim
Asa batamu kamilah sanang
Ka panjago silaturrahim
Pamupuak kasih jo saying

Tamanuang tagak bukik bulek
Manatok i nagari canduang
Bujang gadih lah tabang lorek
Nan gaek sajo tingga di kampuang


Sarasah lah sagan tajun
Sawah indak barayie lai
Dahulu basawah ladang jo kabun
Kinilah lah banto jo saliguri

Dagang lah mabuak jo kiambang
Di kampuang sirieh lah jadi karisiek
Manangih lasuang di pintu kandang
Kinantan tabang tak babaliak

Padi taserak lah jadi salibu
Jaguang di kaka lah ba urek
Banang lawah manutuik pintu
Kandang lapuak sangkak lah ruek

Surau gadang kinilah sunyi
Di lapau sanjo indak ba urang
Musabaqah indak sumarak lai
Sandiwara lah lamo hilang

Maratok benteang ja kabun binanatang
Jam gadang mahituang hari juo
Kok lai bana di silau urang
Indak nan kontan surang juo

Panjang hiduang putiah kuliknyo
Kama pai basarawa singkek
Lain tanyo lain jaweknyo
Saroman urang gilo sasek

Lah banyak labuah basimpang
Ulah di aliah urang lalu
Dek lamak rayu urang nan datang
Lah abih galeh baru tau

Pinang mudo layua dibatang
Arai mayang manyasak kulik
Sadah masiek gambielah jalang
Carano lah jadi barang antic

Tamanuang pinyaram jo kalamai
Ajik maratok di kuali
Tak mungkin lai badan tapakai
Urang baralek lah di batawi

Antah ka jadi ka buah tangan
Panyanangan hati rang di jao
Elok katiko sadang makan
Kanyanglah lupo dima asanyo

Manyasa puluik jadi katan
Dagang bakandak bareh ampiang
Angek pariuak lah di tahan
Dagang manulak masuak piriang

Anak banyak larek sadonyo
Rumah gadang lah banyak ungkai
Kami hituang labiah saparo
Anak rang canduang nan tagadai

Kami tapaga karambia condoang
Tungguanyo sajo nan ba ratoki
Ka ditabang tanaman joloang
Dibiakan maracun hati

Kok di kana jo di ingek
Sasak rasonyo dalam dado
Kasieh bajalin di bukik bulek
Manga di ancol bajadinyo

Bajanji buliah manunggu buliah
Tapi kami bakicuah juo
Lupo dagang jo ampiang dadieh
Cubadak bakecap nan mandayo

Lah lupo kanduang kalio randang
Tempe bagoreang nan marayu
Tangguli tabu nan kanduang buang
manyih kecap nan katuju

Ratok kok lai dagang simak
Himbau kok lai basahuti
Pintak kami indak doh banyak
Pulang kampuang janguaklah nagari

Tatumpah kasieh di jao
Sayang jo canduang usah lupokan
Usah turuikkan pandangan mato
Kato bathin cubo dangakan


Kini canduang lah tagadai
Pasa di unyi urang lua
Ibo hatinyo ameh urai
Perak basapuah nan kanduang kaja

Itu di kami nan marusuah
Dagang lah mabuak jo kiambang
Mukasuik mahapuih paluah
Palak lapeh kok gata nan datang

Ingek ingek sabalun kanai
Bakulimek sabalun abih
Pinjaik dapek kapak tagadai
Kok batuka galak jo tangih

Sapucuak surek nan kami tulih
Pak wali bana nan ma antakan
Kok kurang kareh bunyi tangih
Bialah pak wali nan manambahkan

Maratok canduang koto laweh
Ibarat urang ba alang alang
Panek manuntun jo karateh
Bingkai jo banang di kumpat urang

Jo kumpalan kami maratok
Alang alang di bao angin
Ikolah akibat talampau arok
Nan kanduang manjadi urang lain

Bukan kami sayang jo banang
Jo alang alang kami piduli
Bingkai dapek kok urang buang
Dek urang banang nan nyo cari

Tuntun kajadi umpan tungku
Bingkai mungkin ka tusuak sate
Hilang laleh jaso maramu
Awak di anggap urang sepele

Lah malatua tangan marauik bingkai
Panek manimbang samo barek
Alun talakik kami mamakai
Dek angin nyo baok larek

Lai bana pulang di hari rayo
Mabuak malagak oto basalang
Gilo marede jo ma hao
Ka kampuang haram manyumbang

Janji ba ruok ma limbak limbak
Ayie satitiek haram basuo
Di canduang rumah lah rampak
Di jawa sibuk mambagi harato

Pai bana kami ka jawo
Manyilau cucu dek taragak
Indak tantu nan kami baco
Cucu ndak padai bahaso awak

Lah jaleh kami berang
Galak nan keceknyo
Lah kami cubo sajo tanang
Di cuek in katonyo

Sulik bana kami mangecek
Banyak rabo nan tasuo
Kami tanyokan ma nan ketek
Katiak di unjuakan no

Di bao cucu bajalan jalan
Latieh kami dibuek no
Paluah di kaniang lah bailiran
Capek juo di sabuk no

Dek sabab karano itu
Toloanglah tunjuak di ajari
Bahaso awak bianyo tau
Jan tajadi nan bak kini

Dima bumi dipijak
Disinan langik kito jujuang
Tapi bukan alasan nan bijak
Untuak dagang lupo jo kampuang

Adat dikundang pai
Kok sara’ lakek di tubuah
Walau ka tingga di lua bumi
Dipakai bapantang lusuah


Cupak panuah gantang balanjuang
Tapi basuo saliter indak
Usah salahkan sarueh batuang
Dagang manggantang nan kurang bijak

Surek kok indak ka babaleh
Manalepon hati kok ibo
Kirimkan sajo pasan es em es
Dikampuang kami lah ba hp pulo….

Kaba tarakhir nan kami danga
Dirantau lah tagak radio PUSAKO
Mungkin disiko bisa baraja
Manggali budaya leluhur kito

Jadikan tampek baleroang adat
Kajadi surau tampek mangaji
Tampek musyawarah jo mufakat
Silang sangketo kok tajadi

Dek sabab karano itu
Pandai pandai malah manjago
Mambuek banyak nan mampu
Nan sulik adolah mamaliharo

Banyak contoh nan kito liek
Nan kajadi suri jo tauladan
Baru ka tagak lah nak ruek
Dek pondasi kurang tahan

Ado panyakik nan paliang parah
Panyakik urang tabalakang
Sanang mancaliak urang susah
Susah mancaliak urang sanang

Iko nan harus disikapi
Bakarajo jo awak samo awak
Saukua mangko manjadi
Sasuai mangko takanak

Cukuik sahinggo iko dahulu
Panjang bana kanduang kok bosan
Kaba barito kami tunggu
Kok ka baragieh ka pak wali titipkan..

Cibubur, 10102010. Yanto Jambak

BARALEK GADANG

BARALEK GADANG

H imbaulah samo kalampauan
Bisiak lah samo kito danga
Halal bi halal nan ka diadokan
Lah sapakat saluruh anggota

A cara awak untuak awak
Mampa arek tali silaturrahmi
Sambia bagarah bakucikak
Mangana kampuang jo nagari

L ah ba ukua jo bajangko
Insyaallah ka baralek gadang
Tanggal 12 sasudah rayo
Sahari ka ranah Minang

A sa banamo urang Minang
Ipa bisan hando sumando
Kasadonyo turuik ba undang
Simpatisan di bao sato

L angkahkan kaki ayunkan tangan
Melah kito ba rami rami
Basalam bajawek tangan
Kito abihkan hari sahari

B agalak basuko suko
Sambia mangana kampuang halaman
Kok indak talakik pulang rayo
Disiko taragak dilapehkan

I katan Keluarga Minang
Mangabek nan taserak
Ibarat balairuang rumah gadang
Ka tampek kito duduak barapak

H ujan ameh dinagari urang
Hujan batu dikampuang kito
Nan kito tatap ingin pulang
Baitu tandonyo cinto

A dat dikundang pai
Sara’ lakek ditubuah
Walau ka tingga di lua bumi
Dipakai bapantang lusuah

L apuak lapuak dikajangi
Maminteh sabalun hanyuik
Usang usang di pabaharui
Tali pangabek nak jan balumuik

A wak taserak dimano mano
Alun sadanciang nan bak basi
Disikolah IKM ka pungsinyo
Nak mangabek bak sapu lidi

L ah samo samo kito caliek
Minangkabau kok diliek
Bak ayam baranak itiek
Lah lupo induak maliek tabek

U lah dek riak main ayie
Lah lupo ranah jo tapian
Hutang ka ka Minang alun tabayie
Dirantau ameh basuruakkan

R amuak hatinyo ranah minang
Karambie condoang tatanami
Babuah jatuah ka parak urang
Tungguanyo sajo baratoki

A nak banyak larek ka rantau
Lah lupo kampuang jo nagari
Usah disabuik ka manyilau
Paragiahan haram takirimi

N an kayo lah mabuak harato
Lupo dima asa tagak
Di rantau hotel di bueknyo
Dikampuang rumah lah rampak

G antang panuah cupak balanjuang
Di hituang saltier usak
Kalangik bana tuah malambuang
Apo gunonyo pusako ta injak

A wak mangaku urang minang
Tapi lah lupo adat jo sara’
Bakamehi budaya urang
Budaya sandiri lah taserak

W arisan dari niniak mamak
Pusako rang tuo nan dahulu
Antah dima kini talatak
Banyak dek kito indak tantu

A lun bakilek lah bakalam
Tau di kieh kato bayang
Kiniko allahualam
Nyampang ditanyo surang surang

K ilek baliuang lah ka kaki
Kilek camin lah ka muko
Patuik bana kito sadari
Dima latak masalahnyo

D ek sabab karano itu
IKM patuik kito dukuang
Ka jadi wadah pemersatu
Sekaligus tampek balinduang

I nsyaallah samo badoa
Mamintak ka nan Kuaso
Karajo lillahita’ala
Samato mato untuak basamo

R usuah saketek jadi agak
Cameh nan bukan balabihan
Dek sulik batenggang di nan indak
Lai ko mungkin talansuangkan

A ti kareh tanago kurang
Kama lah kami ka baiyo
Dek dunsanak toloanglah tenggang
Ka tukuak tambah jo bilainyo

N ak tuah batabua urai
Itu pituah urang tuo
Dunia dikacak saku tagajai
Iko nan mabuak kiro kiro

T api dek lai basamo samo
Duduak basamo balapang lapang
Kok barek dipikua basamo
Ringan di jinjiang surang surang

A mbiak undangan isikan data
Kok kamanyumbang kami tarimo
Melalui ketua ketua IK
Kami tampuang bara nan ado

U juang pantun buah gurindam
Sakali lai mohon jo do’a
Kito bangkik batang tarandam
Basamo samo kito bisa…….





Yan MJ Basa